जे.के.रोलिङ, ह्यारी पोर्टर श्रृंखलाकी लेखिका
धेरै कम मध्येकी एक सेलिब्रेटीहरुमा ह्यारी पोर्टर श्रृंखलाकी लेखिका जे.के. रोलिङ पनि पर्छिन् जो कुनै समयमा आर्थिक अवस्था कमजोर भएका कारण आत्महत्याको बाटो अपनाउन पुगेकी थिइन् । आर्थिक अवस्था सुध्रियोस् र जिन्दगी केही राम्रो बनोस् भन्ने चाहना राख्ने धेरै व्यक्तिहरुमा उनी एक पनि पर्थिन् । ह्यारी पोर्टर श्रृ्रंखलाले प्रसिद्ध पाउनुभन्दा पहिले उनी धोका, सम्बन्धबिच्छेद र आर्थिक समस्याबाट ग्रस्त थिइन् । सायद ह्यारी पोर्टर किताब पढ्ने मध्ये थोरैलाई थाहा होला कि उनले ह्यारी पोर्टरको पहिलो र दोस्रो श्रृंखला क्याफेमा बसेर क्याफेमा पाइने कागजका रुमाल (न्याप्किन)मा लेखेकी थिइन् ।
उनी मात्र एकल आमा थिइनन् जो जागिरका लागि यता उता भौतारिरहेकी थिइन्, उनलाई सयौं व्यक्तिले भनेकी लेखेर जीवन पाल्न सकिन्न त्यसैले अन्य काम गर्नु । तर, उनी लेखेरै अर्बपति बन्ने पहिलो लेखक पनि बनिन् । फोब्र्स म्यागजिनले उनलाई पहिलो अर्बपति लेखकका रुपमा परिचय दियो । अहिले उनी फेरि चर्चामा छिन् । किनकी उनले आफ्नो अर्बौ सम्पत्ति गुमाएकी छिन् र फोब्र्सको अर्बपतिहरुको लिष्टबाट बाहिरिएकी छिन् । उनले १ सय ६० करोड डलर च्यारिटीमा दिएकी छिन् । यसका साथै उनले लुमस भन्ने एउटा संस्था पनि खोलेकी छिन् जसले बालबालिकाहरुलाई मद्दत गर्नेछ ।
रोलिङले भनेकी छिन् कि जब कसैले आफूलाई चाहिनेभन्दा बढी पाउँछ तब उसको सामाजिक र नैतिक दायित्व हुन्छ कि उसले समाजको लागि केही गरोस् । यही अनुरुप नै आफूले किताब बेचेर पाएको पैसा च्यारिटीमा दिएको उनले प्रष्ट पारेकी छिन् ।
उनले लेखेको उपन्यासको सुरुवाती च्याप्टरहरु उनको जीवनकै कहानी हो । जहाँ ह्यारी पोर्टरले आफ्नो बुवाआमालाई गुमाउँछ । रोलिङले पनि २५ वर्षको उमेरमा नै आफ्नी आमा गुमाइन् । त्यसपछि उनको अवस्था झन् तनावग्रस्त बन्यो जब उनको प्रेम विवाह गरेका श्रीमान्ले मात्र १३ महिनमा उनीसँग सम्बन्ध बिच्छेद गरे । त्यतिबेला उनको छोरी जन्मिसकेकी थिइन् । उनीसँग कुनै जागिर थिएन त्यसमाथि आफ्नी छोरीलाई पाल्नुपर्ने अवस्थाले उनी अत्यन्त मर्माहत बनेकी थिइन् कि समस्यासँग जुध्न नसकेर कतिपटक उनले आत्महत्याको प्रयास समेत गरिन् । तर, भाग्यलाई अरु नै कुरा मन्जुर थियो । उनले आफ्नो डिप्रेशन र तनावलाई ह्यारी पोर्टरमा देखिने राक्षसहरुमा परिणत गरिन् र त्यसलाई नै कथाको रुप दिइन् ।
उनले जागिर पाइरहेकी थिइन्न, आफ्नो र छोरीको खर्च धान्नका लागि उनले आफूले लिएको अपार्टमेन्ट भाडामा दिइन् र आफू बेसहारा बस्ने आश्रममा बस्न गइन् । अपार्टमेन्टबाट आएको भाडाले उनले छोरीको आवश्यकताहरु पूरा गर्थिन् । उनी एकदमै चिन्तामा थिइन् । उनलाई त्यसरी बस्न लाज पनि लागेको थियो । तर जिन्दगी कता गइरहेको छ भन्ने केही थाहा नभएकी जागिरका लागि यताबाट उता भौतारिने गर्थिन् ।
यस्तै एक दिन म्याचेस्टरबाट लण्डन जानका लागि रेल पर्खिरहेको अवस्थामा उनलाई दिमागमा ह्यारीपोर्टको कथा आयो । उनले किताब लेख्ने सोचिन् र आफ्ना भोगाई, आमाको निधन एवं सबै दुःख पीडालाई उनले किताबमा उतार्ने सोचिन् । सधैको जस्तो सामान्य एउटा दिनलाई असामान्य बनाउँदै उनले राक्षस, बोक्सी, जादु आदि विषयलाई समेटेर कथा बुन्न थालिन् । उनी आफ्नो पीडालाई कथा बनाउँदै हरेक दिन लेख्ने गर्थिन् ।
पाँच वर्षसम्मको असफलता, तनाव र त्योसँगै आएको धैर्यता पछि बल्ल उनको किताब ह्यारी पोर्टर सकियो । जिन्दगीको संघर्ष त थियो नै अब उनलाई त्यो किताब छाप्न पनि संघर्ष गर्नु प¥यो । सन् १९९५ मा उनले विभिन्न पुस्तक प्रकाशकसँग ह्यारी पोर्टर किताब छाप्नका लागि अनुरोध गरिन् । तर, त्यो संयोग यत्तिकै जुरेन । उनलाई १२ नाम चलेका राम्रा पुस्तक प्रकाशकहरुले अस्वीकार गरिदिए । १२ ठाउँमा ढोका ढक्ढक्याउँदा र अस्वीकृत हुँदा उनी झन् विक्षिप्त बनिसकेकी थिइन् । अन्त्यमा, ब्लुमस्बेरी नामक प्रकाशन गृहले उनको पुस्तक छाप्ने भयो र मात्र ४ हजार डलरमा ब्लुमस्बेरीले ह्यारीपोर्टको पाण्डुलिपी रोलिङसँग खरिद ग¥यो ।
प्रकाशन भएको वर्षदिन नबित्दै ह्यारी पोर्टर किताबले सबै बालबालिकाको मन छोयो र यसले त्यो वर्षको ब्रिटिस बुक अवार्ड पनि जित्यो । सन् १९९८ मा त्यही किताबको रिजर्भ राइट अमेरिकी प्रकाशन गृह स्कोलाष्टिकले १ लाख ५ हजार डलरमा किन्यो ।
किताबको लोकप्रियतासँगै जेके रोलिङका दिन फेरिए । ह्यारी पोर्टको तेस्रो र चौथो संस्करणले विश्वमै रेकर्ड कायम गर्यो । संसारकै सर्वाधिक बिक्री हुने किताबका रुपमा अझ पनि यो रेकर्डमै छ । सातौं श्रृंखलासम्म आइपुग्दा यसका चलचित्रहरु पनि बने । यसले पनि रोलिङलाई विश्वकै धनी लेखिकाका रुपमा स्थापित ग¥यो ।
उनको जीवनबाट हामीले तीनवटा महत्वपूर्ण कुराहरु सिक्न सक्छौं । एउटा असफलता कारण आफूलाई रोक्ने काम नगर्नु ः यदि तिमी विभिन्न कामहरुमा असफल भइरहेको छौं भने त्यसलाई आफूलाई रोक्न नदेऊ । जिन्दगीमा अप्ठ्यारा समयहरु आइरहेका छन् भने पनि निरन्तर अगाडि बढ ।
आफूले गरिरहेको काम नछाड र आफ्ना सपनाहरुलाई पनि नछाड ः रोलिङको जीवनमा आमाको अचानक हुन पुगेको निधन, श्रीमान्ले दिएको धोका, सम्बन्ध बिच्छेद, एकल आमाको रुपमा बच्चालाई हुर्काउनु, कुनै जागिर नपाउनु जस्ता समस्याहरु आइरहे । तर उनले ती सबै समस्याहरुसँग जुध्दै किताब लेख्ने आफ्नो कामलाई छाडिनन् । उनले अंग्रेजी शिक्षिकाकै रुपमा जीवन व्यति तगर्न सक्थिन् । तर उनले लेखिका बन्ने आफ्नो सपनालाई मर्न दिइनन् र अन्ततः यही कुराले नै उनलाई विश्वकै धनी लेखकका रुपमा परिचय गरायो ।
सफलता भनेको एकै रातमा मिल्ने कुरा हैन ः रोलिङलाई पहिलो किताब सकाउन ५ वर्ष लाग्यो । त्यो पाँच वर्ष उनका लागि पाँच जुनी बराबर थियो । किताब सके पछि पनि उनले सजिलै त्यसलाई छाप्न पाइनन् । करिब १२ पुस्तक प्रकाशन गृहले उनलाई अस्वीकार गरे । उनीहरु भन्थे किताब धेरै लामो छ, बच्चाहरुले यस्तो कथा मन पराउन्नन्, तर त्यही किताब अन्ततः हरेक बच्चाहरुको प्रिय पुस्तक बन्न पुग्यो ।
त्यसैले हामीले पनि यो बुझ्नु पर्छ कि कुनै पनि कुरा भनेको सजिलै आउँदैन, सफलता सजिलै मिल्दैन । यसका लागि लामो धैर्यता पनि आवश्यक पर्छ ।
एजेन्सीको सहयोगमा, ६ असोज २०७३, २।००
वि.सं.२०७३ असोज ६ बिहीवार ११:२४ मा प्रकाशित