जाजरकोट । जाजरकोट सदरमुकाम खलङ्गाको खानेपानी समस्या समाधान गर्न करिब रु ३६ करोडको लागतमा खानेपानी योजना निर्माण हुने भएको छ ।
आयोजना निर्माणपछि खलङ्गावासीलाई खानेपानी उपलव्ध हुनेछ । जाजरकोट खलङ्गा खानेपानी तथा सरसफाइ आयोजना निर्माणको काम आगामी मङ्सिर–पुष महिनाबाट सुरु हुने भएको छ ।
आयोजनाको डिपीआर बनाउने काम अन्तिमचरणमा पुगेको भन्दै आउँदो भदौ महिनाभित्रै डिपिआर तयार हुने प्लस इन्जिनियरिङ कन्सलटेन्सीले जनाएको छ ।
अहिले १३ वटा साना मुहानलाई समेटेर पानी संकलन गर्ने गरी योजना बनाइएको कन्सलटेन्सीका लक्ष्मण आचार्यले बताउनु भयो ।
बुदबुदे र पोखरा मुहानवाट ल्याएको पानीले मात्र खलंगाको माग पुरा गर्न नसक्ने भएकोले भेरीवाट पनि पानी तान्ने योजना बनाइएको अर्का इन्जिनियर त्रिरत्न शाक्यले बताउनु भयो ।
उहाँले खलंगावासीको माग पुरा गर्नको लागि १९ लिटर प्रतिसेकेन्ड पानी सुक्खा समयमा भेरी नदिवाट तान्ने उल्लेख गर्नुभयो ।
पुरानो संरचना सवै परिवर्तन गर्नुपर्ने र भेरीवाट पानी तान्नु पर्ने भएकोले करिव ३६ करोड रुपैया लागत लाग्ने इन्जिनियर शाक्यले बताउनु भयो ।
खानेपानी आयोजना निर्माणको लागि सरकारले चालु आर्थिक वर्ष २०७३–७४ को लागि १ करोड ५० लाख रुपैया विनियोजन गरेको छ ।
आयोजनाले साविकको खलंगा गाविसको वडा न १, २, ३ र ४ को साथै भेरी मालिका नगरपालिका वडा न ३ र ४ का बासिन्दालाई खानेपानीको सेवा पुग्ने खानेपानी तथा सरसफाई सव डिभिजन कार्यालय जाजरकोटले जनाएको छ ।
प्रकाशितः २०७३ साउन ८
वि.सं.२०७३ साउन ८ शनिवार १३:५३ मा प्रकाशित