काठमाण्डौं । राष्ट्रिय प्रजातन्त्र पार्टीका अध्यक्ष लोकेन्द्रबहादुर चन्दका छोरा जयन्त चन्दलाई प्रधानमन्त्री केपी ओलीले वाणिज्य मन्त्रालयको जिम्मेवारी सुम्पेका छन्। चन्द मन्त्रीमा थपिएसँगै ओली मन्त्रिपरिषद् ६ उपप्रधानमन्त्री, २२ मन्त्री, १० राज्यमन्त्री र २ सहायक मन्त्रीसहित ४१ सदस्यीय भएको छ।
५१ वर्षीय नवनियुक्त मन्त्री चन्दले हिजो राष्ट्रपति भवनमा राष्ट्रपति सामु शपथ लिएका थिए । चन्द राप्रपाबाट समानुपातिक सभासदमा मनोनीत भएका हुन्। इतिहासमा स्नातकोत्तर गरेका चन्द २०५९ सालदेखि राप्रपाका केन्द्रीय सदस्य थिए। उनी २०६० सालदेखि २०७० सालसम्म पार्टीका विदेश विभाग संयोजक पनि थिए।
संयुक्त सरकारमा राष्ट्रिय प्रजातन्त्र पार्टीको भागमा परेको वाणिज्य मन्त्रालयको जिम्मेवारी यसअघि श्रम तथा रोजगार मन्त्रालयको जिम्मेवारीसमेत सम्हालिरहेका दीपक बोहोराले नै सम्हालिरहेका थिए।
६ बैशाख २०७३, ८।००
वि.सं.२०७३ वैशाख ६ सोमवार ११:०० मा प्रकाशित