काठमाण्डौं । काठमाडौँ महानगरपालिकाले घरजग्गा करको शीर्षकमा चैत मसान्तसम्ममा रु ३९ करोड असुल गरेको छ । महानगरले ५४ करोड रुपैयाँ उठाउने लक्ष्य लिएकोमा अझै धेरै उठ्न बाँकी रहेको जनाएकोछ ।
पछिल्लो समय महानगरपालिकाभित्र सञ्चालित होटल क्रमशः करको दायरामा आउन थाले पनि सार्वजनिक संस्थान र ठूला व्यापारिक भवनले भनेझैं कर तिर्न नआएको कामपाले जनाएको छ । कामपाले कर नतिर्नेमाथि कानुनी प्रक्रिया अघि बढाएपछि पछिल्लो समय कर तिर्नका लागि विवरण लिएर भने आउने गरेका छन् ।
सार्वजनिक जग्गामा बनाइएका घर व्यापारिक प्रयोजनका लागि उपयोग भएको अवस्थामा जग्गा कर पनि तिर्नुपर्ने हुन्छ । तर यस्ता संस्थान भने सार्वजनिक जग्गाको कर तिर्नुनपर्ने भन्दै आलटाल गरिरहेका छन् ।
दुग्ध विकास संस्थान, नाचघर कम्प्लेक्स, वल्र्ड टे«ड सेन्टर, पुष्पाञ्जलि सिनेमा हल, नेसनल ट्रेडिङ लि, केएल टावर, अल्फाबिटा आदिले कर नतिरेका कारण लक्ष्यमा पुग्न नसकिएको महानगरले जनाएकोछ ।
महानगरपालिकाले कर नतिर्ने व्यावसायिक भवन र संस्थानको चलअचल सम्पत्तिको रोक्का गर्ने, नवीकरण नगर्ने, फोहर नउठाउनेजस्ता कारबाही गर्ने बताएको छ ।
१३ जेठ २०७३, ९।००
वि.सं.२०७३ जेठ १३ बिहीवार १३:०४ मा प्रकाशित
