काठमाडौँ । नेकपा (एमाले)का नेता कृष्णगोपाल श्रेष्ठले मुलुकमा संविधान कार्यान्वयन गरी देशलाई आर्थिक समृद्धिमा लैजान वाम गठबन्धनलाई जिताउनुपर्ने बताउनुभएको छ ।
संयुक्त वाम गठबन्धनद्वारा आज नागार्जुन नगरपालिका–७ मा आयोजित चुनावी कार्यक्रममा उहाँले सो गठबन्धनले बहुमत प्राप्त गरी सरकारको नेतृत्व गरेमा पाँच वर्षभित्र मुलुकमा औद्योगिक क्रान्ति गरेर जनतालाई आर्थिक पहुँचमा विस्तार गर्ने बताउनुभयो ।
नेता श्रेष्ठले देशमा सरकारको स्थायित्व कायम हुन नसक्दा ठूला परियोजना अलपत्र पर्ने र सुशासन कायम हुन नसक्ने उल्लेख गर्दै अब देश र जनताको प्रगतिका लागि यो गठबन्धनलाई अवसर दिन आग्रह गर्नुभयो ।
काठमाडौँ निर्वाचन क्षेत्र नं ९ का उम्मेदवारसमेत रहनुभएका नेता श्रेष्ठले भीमढुंगादेखि धार्केसम्म सडक विस्तार गरी स्थानीय उत्पादनलाई बजारीकरण गर्ने आफ्नो योजना रहेको जानकारी पनि गराउनुभयो ।
सोही क्षेत्रअन्तर्गत प्रदेश ९२०का उम्मेदवार केशवप्रसाद पोखरेलले विगतमा नेपाली काँग्रेसले बहुमत प्राप्त गरेर पनि देशमा राजनीतिक स्थिरता दिन नसकेकाले यसपटक जनताले वाम गठबन्धनलाई बहुमत दिनुपर्ने बताउनुभयो ।
उहाँले स्थानीय विकासका साथै पूर्वाधार निर्माणका लागि आफूसँग प्रस्ट दृष्टिकोण र योजना रहेको बताउँदै त्यसलाई कार्यान्वयन गरी देशलाई विकसित राष्ट्रका रुपमा स्थापित गर्नुपर्नेमा जोड दिनुभयो । (रासस)
प्रकाशित मिति : ११ मंसिर २०७४
वि.सं.२०७४ मंसिर ११ सोमवार १८:२८ मा प्रकाशित