तीन वर्षभित्र कम्तिमा १२ सय मेगावाट बिजुली राष्ट्रिय प्रसारण लाइनमा थपिने भएको छ। नेपाल विद्युत प्राधिकरण र निजी क्षेत्रले बनाइरहेका जलविद्युत आयोजना पुरा भएर तीन वर्षमा १२ सय देखि १५ सय मेगावाट बिजुली थपिने नेपाल विद्युत प्राधिकरणका प्रबन्ध निर्देशक कुलमान घिसिङले बताए।
नेपालीहरुको लगानीमा माथिल्लो तामाकोशी (४५६ मेगावाट) आयोजना निर्माणाधीन छ। डेढ वर्षभित्र यो आयोजना सम्पन्न गर्ने लक्ष्य छ। ‘कुलेखानी तेस्रो, चमेलिया र त्रिशुली थ्री ए तीन वर्षभित्र बनिसक्छन्’, घिसिङले भने, ‘निजी क्षेत्रका आयोजनाबाट पनि प्रतिवर्ष डेढ सय मेगावाट बिजुली थपिन्छ।’ कुलेखानी तेस्रो १४, चमेलिया ३० र त्रिशुली थ्री ए ६० मेगावाटका आयोजना हुन्।
चिलिमे जलविद्युत् आयोजनाले अहिले मध्यभोटेकोसी, रसुवागढी, साञ्जेन, माथिल्लो साञ्जेन निर्माण गरिरहेको छ। ती आयोजनाबाट २७० मेगावाट विद्युत् उत्पादन हुनेछ। ‘यी आयोजना पुरा हुनेमा हामी ढुक्क छौं,’ घिसिङले भने, ‘निजी क्षेत्रबाट अझ धेरै बिजुली आउन सक्छ।’ उनले तीन वर्षपछि बिजुलीको माग दुई हजार मेगावाटभन्दा बढी हुने पनि बताए।
प्राधिकरणले नियमित बिजुली दिनसक्यो भने त माग बढेर तीन हजार मेगावाटसम्म पुग्न सक्ने घिसिङले बताए। अहिले नेपालमा करिब १३ सय २५ मेगावाट बिजुली माग छ। त्यसमा करिब ५ सय ५० मेगावाट नेपालमा उत्पादन हुन्छ भने तीन सय ५० मेगावाटको हाराहारीमा भारतबाट आयात गरिएको छ।
प्रकाशित मितिः २०७३ माघ २६
वि.सं.२०७३ माघ २६ बुधवार ०८:४३ मा प्रकाशित