काठमाडौं । प्रमुख प्रतिपक्षी दल नेकपा एमालेका प्रभावशाली नेता एवम् पूर्वमन्त्री लालबाबु पण्डितले म्याद तामेलीको हिसावले संविधान संशोधन गर्न चाहेको हो भने एमालेले सहयोग नगर्ने चेतावनी दिए ।
नेता पण्डितले आफ्नो पार्टीले देशको आवश्यकत्ता अनुसार मात्रै संविधान संशोधन हुने कुरा गरेको बताएका हुन् । उनले संविधान संशोधनको माग गर्ने मधेशी मोर्चाभित्रै एकरुपता नभएको आरोप समेत लगाए । नेता पण्डितले थपे,‘सरकार अहिले अलमलिएको छ, सरकारका पदाधिकारीहरु छिमेकीसँग बकपत्र गर्न कुद्छन् ।’
उनले नेपाल सँधै अशान्त रहीरहोस र कहिल्यै स्थिरता नहोस भन्नेहरु अहिले सक्रिय भएको आरोप लगाए । उनले अघि थपे,‘नेपालको संविधान समृद्ध हामीले बनाउने हो, तर यहाँ त हामीभन्दा बढ्दा टाउको दुखाई अरु विदेशीहरुलाई भएको छ, यो किन ?’
उनले संविधान संशोधनका पक्षधरहरुको माग एउटै छ है भनेर सरकारले कबुल गर्न सक्नुपर्ने समेत चूनौति दिए । उनले अघि थपे,‘एउटै माग हो भनेर पहिला कबुल गर्नुहोस्, विगतमा जस्तै संविधानलाई सत्तासँग जोड्ने काम गर्नुहुँदैन ।’ उनले छिमेकबाट कोही आए कि केही नेताहरु लम्पसार परिहाल्ने प्रवृत्ति हावी भएको समेत आरोप लगाए ।
उनले संविधान जारी गर्ने शक्तिहरुले डरले थुरुथुरु काँपेर खुट्टा कमाउने हो भने जनताले यो देशमा कहिल्यैपनि शान्ति प्राप्त गर्न नसक्ने समेत ठोकुवा गरे । नेता पण्डितले देश र जनताको आवश्यकत्ता भएमात्रै एमालेले संविधान संशोधनमा सहयोग गर्ने कुरा सार्वजनिक रुपमै आफ्नो पार्टीले राखिसकेकोले उक्त अडानबाट पछि नहट्ने जिकिर गरे ।
उनले भाषा विवाद समाधानको लागि भाषा आयोग गठन भैसकेको भन्दै यसबारेमा अनावश्यक झमेला र समस्या उत्पन्न गराउन नहुने स्पष्ट पारे । पण्डितले सडक र दशगजाबाट संविधान संशोधन नहुने समेत ठोकुवा गरे ।
वि.सं.२०७३ मंसिर ८ बुधवार १८:३६ मा प्रकाशित
