काठमाडौ । उज्यालो नेपाल अभियान सुरु गरेको ऊर्जा मन्त्रालयले २ करोड लिड बल्ब प्रयोग गर्दा २ सय १ मेगावाट बिजुली बचत हुने दाबी गरेको छ । सिएफएल चिमको तुलनामा यो बल्बले कम बिजुली खपत गर्ने हुँदा उक्त परिमाणको बिजुली बचाउन सकिने देखिएको हो ।
मन्त्रालयले गत आइतबार पत्रकार सम्मेलन गरेर बल्ब खरिद गर्दा देशलाई फाइदा हुने हुँदा खरिद प्रक्रियामा भ्रष्टाचार भएको भन्ने गलत समाचार संप्रेशण नगर्न ऊर्जा मन्त्री जनार्दन शर्माले आग्रह गरेका थिए । ‘देशलाई फाइदा हुने र मुलुक उज्यालो बन्ने काममा कहाँ भ्रष्टाचार भयो, ‘ उनले भने, ‘पुष्टि हुनुपर्यो ।’
लिड बल्ब उपयोग गरेर साँझ र बिहानको उच्च माग व्यवस्थापन गर्न सकिने नेपाल विद्युत प्राधिकरणका कार्यकारी निर्देशक कुलमान घिसिङले बताए । यही माग व्यवस्थापन गर्न २ करोड बल्ब किन्न लागिएको पनि उनले प्रस्ट्याए । ‘सार्वजनिक खरिद ऐन, २०६३ नाघेर बल्ब खरिद प्रक्रिया अघि बढाएको भन्ने हल्ला गलत हो,’ उनले भने ।
प्राधिकरणका अनुसार सामुदायिक गरी कूल ३५ लाख ग्राहक छन् । एउटा घरमा १० वटाको दरले बल्ब उपयोग गर्दा करिब साढे ३ करोड हुन्छ । तर, २ करोडमात्र किनेर व्यवस्थापन गर्न लागिएको हो । यसो गर्दा उच्च माग भएको बेला वार्षिक २९३।४६० गिगावाट घन्टा बिजुली बचत हुनेछ ।
उक्त परिमाणको बिजुली बचत हुँदा वार्षिक २८ अर्ब ४६ करोड ५६ लाख २० हजार रुपैयाँ बचत हुने प्राधिकरणको दाबी छ । तोकिएको परिमाणको बल्ब जडान गर्न करिब २३ अर्ब रुपैयाँ खर्च हुनेछ । भारतीय सहयोगमा खरिद तथा जडान हुने बल्बको रकम १० महिनामा तिर्न सकिने घिसिङले बताए ।
उच्च माग हुँदा बचत हुँदा मुलुकको वार्षिक करिब ४७ अर्ब रुपैयाँ बचत हुने मन्त्री शर्माले बताए । सार्वजनिक खरिद ऐन लत्याएर बल्ब खरिद गर्न लागेको भन्ने आरोप गलत रहेको उनले प्रस्ट्याए । उनका अनुसार ऐनको दफा ४१ ९घ० २ अनुसार दुई देशका सरकारको सहकार्यमा खरिद प्रक्रिया अघि बढाइएको हो ।उर्जा खबरबाट
प्रकाशित मितिः २०७४ बैशाख २८
वि.सं.२०७४ वैशाख २८ बिहीवार १५:२८ मा प्रकाशित