नेपालमा शाहवंशीय राजतन्त्रको सुरुवात भएको गोरखामा अझै पनि राजा छान्ने परम्परा कायमै छ । तर, त्यो परम्परा भने अब खेलका रुपमा सीमित छ ।
शाहवंशीय राजतन्त्रको सुरुवात गर्ने द्रव्य शाहले दौड जितेर राजा बनेको स्मरण गर्दै हरेक वर्ष त्यहाँ दौड प्रतियोगिता हुन्छ र पहिलो हुनेलाई राजा घोषित गरिन्छ । यस वर्ष पनि सो खेल सोमबार सम्पन्न भएको छ र नेपाली सेनाका खगेन्द्र रानाभाट यस वर्षको लिगलिगे राजा भएका छन् ।
दौडेर राजा छानिने परम्परालाई निरन्तरता दिँदै लिगलिगकोट विकास अभियानले वर्षेनी राजा छान्दै आएको छ । डोटी घर भएका रानाभाटलाई श्रीपेच लगाएर यसवर्षको लिगलिगे राजा घोषणा गरिएको हो । खेलकुदमन्त्री राजन केसीले श्रीपेच, रु ५० हजार पुरस्कारसहित रानाभाटलाई पुरस्कृत गरे ।
रानाभाटले एक घण्टा दुई मिनेटमा निर्धारित १३.५ किलोमिटर दौड पूरा गरेका हुन् । चेपे नदीस्थित चेपेघाटदेखि लिगलिगकोट डाँडासम्म दौड पूरा गर्नुपर्ने नियम छ । यस्तै नेपाली सेनाकै रामजी बस्नेतले एक घण्टा तीन मिनेटमा निर्धारित दूरी पार गरी दोस्रो भए । बस्नेतलाई रु ३० हजार पुरस्कारसहित मन्त्री केसीले पुरस्कृत गरे ।
यस्तै नेपाली सेनाका अनिश बस्नेतले एक घण्टा ५ मिनेटमा दौड पूरा गरी तेस्रो भए । बस्नेतले रु २० हजार नगद पुरस्कार पाए । ११७ जना धावकले दौड प्रतियोगितामा भाग लिएको आयोजक संस्थाका उपाध्यक्ष सरोज देवकोटाले बताए । दौडमा स्वदेशी, विदेशी धावक सहभागी हुन पाउनेछन् ।
दौड उद्घाटन कार्यक्रममा बोल्दै मन्त्री केसीले लिगलिग दौडलाई निरन्तरता दिन मन्त्रालय तर्फबाट बजेटको व्यवस्था गर्ने बताएका थिए ।
नेपालजापान डटकमबाट
प्रकाशित मितिः २०७४ असोज १०
वि.सं.२०७४ असोज १० मंगलवार १०:३७ मा प्रकाशित
