धादिङ । हामी सेवा गर्छौं भन्ने संकल्प सहित विश्वभर संगठित लायन्स क्लवको एउटा शाखा लायन्स क्लव अफ थानकोटले स्थापनाको छोटो समयमै सामाजिक गतिविधिलाई तिब्रता दिएको छ ।
स्थापनाको दोस्रो वर्षमा धादिङ थाक्रे–३ महादेवबेसीमा सञ्चालित जनजागृती दृष्टिविहिन स्रोत विद्यालयमा अध्ययनरत बालबालिकालाई दैनिक उपभोग्य सामाग्री र लत्ता कपडा सहयोग गरेको छ । क्लवका पदाधिकारी सहित विभिन्न क्लवका लायन अभियान्ताहरुको उपस्थितीमा करिव ७० हजार रुपियाँ बराबरको सामाग्री शनिबार विद्यालयमा आयोजित समारोहमा हस्तान्तरण गरिएको सचिव श्रीहरि थापाले जानकारी दिए ।
सिमित सरकारी अनुदान र विभिन्न दाताको सहयोगमा सञ्चालन गरिएको सो विद्यालयमा दृष्टिविहीन बालबालिकालाई औपचारिक शिक्षा र आवासको व्यवस्था गरिएको छ । आगामी दिनमा पनि निरन्तर सहयोग गर्दै जाने क्लवका अध्यक्ष करण थापाले प्रतिबद्धता व्यक्त गरे । कार्यक्रममा क्लवका पदाधिकारी लगायत बालाजु लायन्स क्लवका पुर्व अध्यक्ष माणिश्री बज्राचार्य र विश्वराज भट्टराई लगायत लायन्स क्लव परोपकार, पिस आई दरवार मार्ग, विशाल बजारको तर्फबाट उपस्थिति रहेको थियो ।
कार्यक्रममा स्रोत विद्यालयका प्रमुख बिमल थापाले धन्यवाद ज्ञापन गर्दै आगामी दिनमा बालबालिकाको गुणस्तरीय शिक्षामा सहयोगको अपेक्षा गरे । बिद्यालयमा ३२ जना बालबालिका आवासीय रुपमा अध्ययन गर्दै आएका छन् |
२९ जेठ २०७३
वि.सं.२०७३ जेठ ३० आइतवार १३:०३ मा प्रकाशित