काठमाण्डौं । आइतबार गत बर्षको वित्तीय विवरण सार्वजनिक गरेका चार बैंकमध्ये एभरेष्ट र नेपाल एसबिआइ बैंकको भने उल्लेख्य नाफा बढेको छ भने स्ट्यान्डर्ड चार्टर्ड बैंकको नाफा घट्न पुगेकोछ । त्यस्तै, मर्जरपछि बनेको बैंक अफ काठमाण्डू लुम्बिनी बैंकको नाफामा बढोत्तरी भएको छ ।
एभरेष्ट बैंकको नाफा एक अर्ब ५७ करोड रुपैयाँबाट बढेर एक अर्ब ७३ करोड रुपैयाँ पुगेको छ । कर्जा लगानी विस्तारसँगै खुद ब्याज आम्दानीमा बृद्धि भएपछि बैंकको नाफा उक्लिएको हो । बैंकले नौं करोड २७ लाख रुपैयाँ राइट ब्याक गर्दै १६ करोड ८१ लाख रुपैयाँ प्रोभिजनिङमा छुट्याएको छ ।
स्ट्यान्डर्ड चार्टर्डको नाफा एक अर्ब २९ करोडबाट घटेर एक अर्ब २६ करोडमा खुम्चिएको छ । स्प्रेड दर घटेर ब्याज आम्दानी कम भएपछि बैंको नाफा ओरालो लागेको हो ।
नेपाल एसबिआइ बैंकले भने एक अर्ब ६ करोडको नाफालाई बढाएर एक अर्ब ३३ करोड रुपैयाँ पुर्याएको छ । बैंकले खुद ब्याज आम्दानी बढाउँदै केही ऋण राइट ब्याक गरेका कारण नाफामा उल्लेख्य सुधार देखिएको हो ।
बैंक अफ काठमाण्डू लुम्बिनीले ७५ करोड ८१ लाख रुपैयाँ नाफा गरेको छ । कुल नाफामा लुम्बिनी बैंकको मात्र हिस्सा ३६ करोड ३२ लाख रुपैयाँ छ । बैंकको नाफा मर्जरपछि केही वढेको हो ।
३० साउन २०७३, ९।००
वि.सं.२०७३ साउन ३० आइतवार ११:३९ मा प्रकाशित
