काठमाण्डौं । सरकारले स्थानीय तह निर्धारण आयोगको प्रतिवेदन राजपत्रमा प्रकाशित गरेको छ । मन्त्रिपरिषदले यही फागुन २२ मा ७ सय ४४ स्थानीय तह हुनेगरी गरेको निर्णय आज राजपत्रमा प्रकाशित भएपछि कार्यान्वयनमा आएको छ।
हिजो सरकारमा गएर सपथ खाएपछि उपप्रधान एवं संघीय मामिला तथा स्थानीय विकासमन्त्री कमल थापाले मन्त्रालयमा आज काम गर्न सुरु गरेकै दिन राजपत्रमा सूचना प्रकाशित गरी नयाँ संरचना लागू भएको घोषणा गरेका हुन् ।
नयाँ संविधान अनुसार स्थानीय तह निर्धारण आयोगले बनाएको प्रतिवेदन परिमार्जन सहित सरकारले राजपत्रमा प्रकाशित गरेको हो। संविधानअनुसार यो प्रतिवेदन प्रकाशित भएपछि आजैदेखि स्थानीय तह खारेज हुन्छन् । गाउँ विकास समितिका कामकारबाही आजैदेखि अन्तरिम भएका छन्। स्थानीय निकायलाई हटाएर संविधानअनुरुप स्थानीय तह बनेपछि आजैदेखि कार्यान्वयनमा आएको हो।
स्थानीय तहको नयाँ संरचनाअनुसार देशभरमा ४ वटा महानगरपालिका, १३ वटा उपमहानगरपालिका, २ सय ४६ नगरपालिका र ४ सय ८१ गाउँपालिका रहने छन्। सबै स्थानीय तहमा गरी ६ हजार ६ सय ८० वडा कायम भएका छन्। यसअघि नयाँ नगरपालीकाको घोषणापछि ३ हजार १ सय ५७ गाविस र २ सय १७ नगरपालिका कामय थिए।
२७ फागुन २०७३, ११।००
वि.सं.२०७३ फागुन २७ शुक्रवार १३:३९ मा प्रकाशित
