काठमाडौँ । विद्युत प्राधिकरणले ढल्केबर–मुजफ्फरपुर अन्तरदेशीय प्रसारण लाइन हुँदै बुधबारदेखि भारतबाट १५ मेगावाट बिजुली आयात गरेको छ । प्राधिकरण र भारतीय कम्पनी एनभीभीएनबीच सोमबार भएको सम्झौताअनुसार भारतबाट नेपाल–भारतबीचको पहिलो अन्तरदेशीय प्रसारण लाइनबाट बुधबारदेखि बिजुली आयात गर्न थालिएको हो ।
एनभीभीएनले ढल्केबर–मुजफ्फर प्रसारण लाइनबाट प्राधिकरणलाई ८० मेगावाट बिजुली दिने सम्झौतामा उल्लेख छ । एनभीभीएनले उत्पादक कम्पनीहरूसित बिजुली खोज्न समय लागेकाले बुधबार १५ मेगावाटमात्र बिजुली नेपाल निर्यात भएको जानकारी विद्युत प्राधिकरणको भार प्रेषण केन्द्रका प्रमुख भुवन क्षेत्रीले दिए ।
‘अन्तरदेशीय प्रसारण लाइनबाट बुधबारदेखि १५ मेगावाट बिजुली आयात सुरु भएको छ’ क्षेत्रीले कान्तिपुरसित भने– ‘भोलि (बिहीबार) बेलुकासम्ममा उक्त प्रसारण लाइनबाट ७० मेगावाट बिजुली आयात हुन थाल्नेछ । उत्पादक कम्पनीहरूसित एनभीभीएनले बिजुली खोज्नुपर्ने भएकाले सुरुमै ८० मेगावाट नआएको हो ।’
उनले दुई/तीन दिनपछि नै सम्झौताबमोजिम ८० मेगावाट नै बिजुली आयात सुरु हुनेछ । हाल नेपालले अरू प्रसारण नाकाबाट २ सय ३५ मेगावाटसम्म बिजुली आयात गरिरहेको छ । ८० मेगावाट थपिएपछि भारतबाट आयात हुने बिजुली ३ सय १५ मेगावाट पुग्नेछ ।
८० मेगावाट थपिएपछि मुलुकमा दैनिक २ घन्टासम्म लोडसेडिङ घट्ने जानकारी प्राधिकरणका अर्का अधिकारीले जानकारी दिए । हाल साताको ९३ घन्टा अर्थात् दैनिक सरदर १३ घन्टा लोडसेडिङ भइरहेको छ । कान्तिपुर
६ फागुन २०७२ / ६:२१
वि.सं.२०७२ फागुन ६ बिहीवार ०६:२७ मा प्रकाशित
