गोरखा । बूढीगण्डकी नदीमा आएको भेलले मनास्लु पदमार्ग अन्तर्गत केरौँजाको यारुबगरस्थित बूढीगण्डकी नदीमाथिको मुख्य पुल बगाउँदा सात गाविसका स्थानीयवासी र पर्यटकले पदमार्गको सो खण्ड भई आवागमन गर्न पाएका छैनन् । नदीको भेलले किनारका दुवैपट्टिको पर्खाल बगाएपछि काठको पुल पनि बगेको हो ।
भूकम्पपछि अवरुद्ध रहँदै आएको मनास्लु पदमार्ग गत कात्तिक महिनामा यारुबगरमा काठको अस्थायी पुल बनाएपछि सञ्चालन गरे पनि गत आज बिहान आइतबार आएको भेलले पुनः पुल बगाएपछि पदमार्ग अवरुद्ध भएको हो ।
यारुबगरमा पुल बगेपछि तीन घन्टा घुमेर असजिलो बाटो हुँदै स्थानीयवासी र पर्यटक जगत पुगे पनि खाद्यान्नलगायत सामग्री बोकेका खच्चडहरु आवागमन गर्न सकेका छैनन् ।
पुल बगाएको जानकारी जिल्ला विकास समिति र जिल्ला प्राविधिक कार्यालयमा जानकारी गराए पनि कुनै काम नभएको स्थानीय वासीले बताएका छन् । यारुबगरस्थित बूढीगण्डकी नदीमाथि चारवटा काठे पुल बनाइएको थियो । तीमध्ये नदीमा पानीको सतह बढेकाले अरु पुल पनि बग्ने अवस्थामा पुगेको छ ।
१६ जेठ २०७३, १०.००
वि.सं.२०७३ जेठ १६ आइतवार ११:५८ मा प्रकाशित