सय भन्दा बढि यात्रु बोकेर बुधबार दिउँसो म्यानमारको दक्षिणी सहर मिइकबाट यांगुनका लागि उडेको वाई–८ एफ–२०० हराइरहेको विमानको भग्नावशेष आन्डमन सागरमा फेला परेको छ । विमान बुधबार दिउँसो एक बजेर ३५ मिनेट जाँदा आन्डमन सागरमाथि पुगेपछि ट्राफिक कन्ट्रोलरसँग सम्पर्कविहीन भएको थियो ।
विमानमा १ सय भन्दा बढि सैनिक र उनीहरुको परिवार सवार थिए । सम्पर्कविहीन भएपछि उक्त विमानको खोजीको लागि नौसेना परिचालन गरिएको थियो । हराइरहेको विमान दुर्घटना अवस्थामा फेला परेको र विमान टुक्रा टुक्रा भएको अवस्थामा दक्षिणी मिइकबाट १३६ माइलको दूरीमा रहेको समुद्रमा नौसेनाले फेला परेको मिइक सहरका पर्यटन व्यवसायी नेइङ लिन जाले बताए ।
चालकदलका १४ सदस्य सहित १२२ जना विमानमा रहेको बताईएपनि विमानमा कति यात्रु थिए भन्ने यकिन तथ्यांक सार्वजनिक भइसकेको छैन । म्यानमारको कमान्डर इन चिफको कार्यालयका अनुसार विमानमा सवार यात्रुमध्ये अधिकांश सिपाही र उनीहरूका परिवार थिए । उनीहरूमध्ये एक दर्जनभन्दा बढी बालबालिका थिए । हराइरहेको विमानको खोजीको लागि चारवटा जलसेनाका र दुईवटा हवाई फोर्सका विमान परिचालन गरिएको सेनाले जनाएको छ ।
म्यान्मारमा वर्षातको मौसम सुरु भए पनि विमान उडेको समयमा मौसममा कुनै खरावी नरहेको बताइएको छ । विमान प्राविधिक अथवा अन्य कारणले दुर्घटना भएको हो भन्ने विषयमा अनुसन्धान भैरहेको बताइएको छ ।
‘विमानमा प्राविधिक समस्या आएको हुनुपर्छ, विमान उडेको आकाशमा मौसम सफा थियो,’ विमानस्थल स्रोतको भनाइ उद्धृत गर्दै एएफपीले जनाएको छ । म्यन्मारी सेनाले चीनमा निर्मित सो विमान गत वर्षको मार्चमा किनेको र उक्त विमान सेनाको सामान ओसारपसारका लागि प्रयोग गरिन्थ्यो ।फाईल फोटो
प्रकाशित मितिः २०७४ जेठ २५
वि.सं.२०७४ जेठ २५ बिहीवार १४:०९ मा प्रकाशित
