इनरुवा । सुनसरी इनरुवा–९ बबियाका बलदेव मेहतालाई गाईभैँसीको दूध कहाँ र कसलाई बेच्ने भन्ने समस्याले पिरोल्न छोडेको छ। दैनिक पाँचदेखि १० लिटर दूध बेच्न उत्पादन गर्ने मेहतालाई लामै समय बजार अभावमा रुमलिएका थिए। तर, अहिले त्यो समस्या सकिएको छ।
उनलाई मात्र नभई सुनसरी बबिया गाविसका दर्जनौँ किसानलाई गाउँमा दूध सङ्कलन केन्द्र नहुँदा चिन्ताले सताएको थियो। दूधको बजार र उचित मूल्य दुबैको अभाव थियो । सुनसरी सदरमुकाम इनरुवामा रहेको नवयुग दुग्ध सङ्कलन तथा वितरण केन्द्रले गाउँमै गएर किसानको दूध सङ्कलन गर्न थालेपछि स्थानीयलाई राहत मिलेको छ ।
पहिले कहाँ दूध बेच्ने, कसरी बेच्ने भने चिन्ताले सताएको बेला अहिले नवयुगले गाउँमै आएर दूध सङ्कलन गर्न थालेकाले त्यो सबै चिन्ताले मुक्त भएको बबियाका कृषक बलदेव यादवको भनाइ छ।
बबियामा केन्द्रले दैनिकरुपमा २०० लिटर दूध सङ्कलन गर्दै आएको छ। बबियासहित अन्य केन्द्रमा गरी दैनिक ४०० किसानबाट ६०० लिटर दूध सङ्कलन गर्दै आएको र केन्द्रलाई दिगोरुपमा टिकाइराख्न सबैको साथ र सहयोग आवश्यक रहेको सञ्चालक गोविन्द पोखरेलले बताए। पोखरेलका अनुसार २०७० सालमा स्थापना भएको केन्द्रले मधेसा, बबिया र इनरुवामा गरी चार स्थानमा सङ्कलन केन्द्र स्थापना गरेको छ।
केन्द्रले समूहमार्फत कृषक कल्याण कोषसमेत स्थापना गरेको पोखरेलले बताउनुभयो। कोषमा ८५ हजार रुपैयाँ सङ्कलन भएको र केन्द्रका तर्फबाट पाँच प्रतिशत रकम थप गरि सञ्चालन गरिएको उनको भनाइ छ। अजित कुमार झा/रासस
प्रकाशित मितिः २०७४ बैशाख २७
वि.सं.२०७४ वैशाख २७ बुधवार १५:०२ मा प्रकाशित