काठमाडौं । मुक्तिनाथ विकास बैंकको कात्तिक २३ देखि १ लाख ६२ हजार ८०३.०४ कित्ता सेयर लिलामीमा आउने भएको छ । मुक्तिनाथले संस्थापक समूहको २७ हजार ७६५.५१ कित्ता र सर्वसाधारण समूहको १ लाख ३५ हजर ३७.०४ कित्ता सेयर लिलामीमा बिक्री गर्न लागेको हो ।
लगानीकर्ताले यो सेयरमा न्यूनतम १०० रुपैयाँलाई आधार मानेर निवेदन दिनुपर्नेछ । आवेदन दिने अन्तिम म्याद भने कात्तिक ३० गते तोकिएको छ ।
यसअघि बैंकले भदौ ४ गतेदेखि असोज ८ गतेसम्म मुक्तिनाथले १०ः४ अनुपातमा ६१ लाख ७० हजार ८६५.०४ कित्ता हकप्रद सेयर बिक्री खुला गरेको थियो । जसमा १८ हजार ९१० जना सेयरधनीले ६० लाख ८ हजार ६२ कित्ता हकप्रद सेयरमा आवेदन दिएका थिए । तर कुल १ लाख ६२ हजार ८०३.०४ कित्ता सेयर भने बिक्री हुन सकेन । नबिकेको त्यही सेयर बैंकले लिलामीमा ल्याउन लागेको हो ।
नेपाल धितोपत्र बोर्डको निर्देशनपछि मुक्तिनाथले पहिलो पटक उपत्यकाबाहिरबाट पनि लिलामी सेयर भर्न सकिने व्यवस्था गरेको हुँदा राजधानी बाहिरका लगानीकर्तालाई निकै ठूलो राहत पुग्ने देखिएको छ ।
लगानीकर्ताले बिक्री प्रबन्धक एनआइबीएल क्यापिटल मार्केट्स, लाजिम्पाट काठमाडौ, मुक्तिनाथ विकास बैंकको केन्द्रीय कार्यालय कमलादीबाट आवेदन बुझाउन सक्नेछन् ।
त्यस्तै उपत्यकाबाहिर मुक्तिनाथको शाखा कार्यालयहरु पृथ्वीचोक ९ पोखरा, वीरगन्ज र बुटवलबाट लिलामीको आवेदन फारम बुझाउन पाइनेछ । त्यसैगरी, नेपाल इन्भेष्टमेन्ट बैंकको विराटनगर, नेपालगञ्ज, सुर्खेत र धनगढी शाखाबाट पनि यो लिलामी सेयरमा आवेदन फारम बुझाउन सकिनेछ । । यो बैंकले गत वर्षको नाफाबाट हकप्रद सेयरले समेत पाउने गरी २० प्रतिशत बोनस सेयर र १.०५ प्रतिशत नगद लाभांश दिने प्रस्ताव गरीसकेको छ ।
वि.सं.२०७४ कात्तिक १५ बुधवार ११:१७ मा प्रकाशित
