काठमाण्डौं । सरकारले संगीतलाई प्राविधिक तथा व्यावसायिक धार अन्तर्गत स्कुल तहमा समेत अनुमति दिएको छ। पाइलट स्कुलको रूपमा पिंगलास्थानस्थित नेपाल संगीत विद्यालयलाई छान्दै कक्षा ९ देखि संगीत कक्षा सञ्चालन गर्न स्वीकृति प्रदान गरिएको हो।
नेपालको संगीत र शिक्षा क्षेत्रमा यो पहिलो कदम भएको संगीत विद्यालयका प्रधानाध्यापक इमानविक्रम शाहले जनाए। प्राविधिक तथा व्यावसायिक शिक्षा सञ्चालन निर्देशिका–२०६९ अनुसार गठित केन्द्रीय निर्देशक समितिको हालै बसेको बैठकले यस्तो निर्णय लिएको हो। विद्यालयलाई शैक्षिक सत्र २०७३ देखि नै कक्षा सञ्चालन गर्न स्वीकृति दिइएको छ।
सरकारले रोजगारीमूलक सीप प्रदान गर्ने शिक्षा नीतिअन्तर्गत सिभिल इन्जिनियरिङ, कम्प्युटर साइन्स, प्लान्ट इन्जिनियरिङ, एनिमल हजब्यान्ड्री तथा इलेक्ट्रिकल इन्जिनियरिङ गरी ५ विषयमा २०७० को शैक्षिक सत्रदेखि नै कक्षा ९ देखिको पठनपाठन सञ्चालन गर्ने व्यवस्था गरेको हो।
२९ चैत २०७२, १.००
वि.सं.२०७२ चैत २९ सोमवार १५:१५ मा प्रकाशित
