उत्तर कोरियाले आफूमाथि लगाइने प्रतिबन्ध तथा दिइने दबाबले परमाणु कार्यक्रम रोकिने भन्दा पनि बढ्ने चेतावनी दिएको छ । उत्तर कोरियाले पछिल्लो पटक गरेको परमाणु परीक्षण तथा मिसाइल आक्रमणलाई लिएर संयुक्त राष्ट्रसंघले उसमाथिको प्रतिबन्ध थप कडा बनाएको छ । तर उत्तर कोरियाले भने प्रतिबन्ध तथा दबाबले आफ्नो परमाणु कार्यक्रम नरोकिने बरु यसले परमाणु कार्यक्रम थप हुने चेतावनी दिएको हो ।
संयुक्त राष्ट्रसंघले आफूमाथि लगाएको नयाँ प्रतिबन्धको कडा निन्दा गरेको उत्तर कोरियाले संयुक्त राष्ट्रसंघको कार्य अमानवीय, अनैतिक र क्रुरर रहेको बताएको छ । यसले तनाव र शत्रुता बढाउने उत्तर कोरियाले चेतावनी दिएको छ । उत्तर कोरियाको विदेश मन्त्रालयले जारी गरेको वक्तव्यमा आफ्नो देशमाथि लगाइने प्रतिबन्धले परमाणु कार्यक्रम रोकिनुको साटो बढ्दै जाने र यसले आफ्नो देशको परमाणु लक्ष्य पूरा गर्न सहयोग गर्ने उल्लेख गरिएको सरकारी समाचार संस्था केसिएनएले जनाएको छ ।
उत्तर कोरियाले पछिल्लो पटक गएको शुक्रबार जापानको माथिबाट मिसाइल प्रहार गरेको थियो । त्यो मिसाइल ३७ सय किलोमिटरको दूरी पार गरेको थियो ।
प्रकाशित मितिः २०७४ असो ३
वि.सं.२०७४ असोज ३ मंगलवार १३:०८ मा प्रकाशित