भोजपुर । नेपाल वायु सेवा निगमको जहाज शनिबार भोजपुर विमानस्थलमा बिग्रिएर ग्राउन्डेड भएको छ । ९ एन–एबिटी ट्वीनअटर जहाज बिग्रिएपछि यात्रुहरु अलपत्र परेका छन् ।
यात्रुलाई शनिबार ९ बजे एयरपोर्ट पुग्ने समय दिइएकोमा काठमाडौं–भोजपुर उडानको जहाज अपरान्ह २ बजे अवतरण भएको थियो । जहाजका पाइलट विमानचालक एमबी तुम्बाहाम्फे र उज्वल सिलवालको टोली खाजा खाएपछि भोजपुर–विराटनगरको उडान भर्न लागेको बेला ९ एन एविटि जहाज स्टार्ट नभएपछि नेपाल वायू सेवा निगमको जहाज ग्राउन्डेड भएको हो ।
भोजपुरको टक्सार विमानस्थलमा नेपाल वायु सेवा निगमको जहाज शनिबार अपरान्ह २ बजे भोजपुरबाट–विराटनगर उडान भर्न लाग्दा जहाजको दाँया पंखा घुमेन । जहाज स्टार्ट नभएपछि भोजपुर विमानस्थलमा थन्किएको छ ।
विराटनगरबाट फर्किएपछि काठमाडौं उडानको तालिका थियो । जहाज बिग्रिएपछि भोजपुरदेखि विराटनगर र काठमाडौं जाने यात्रुको विचल्ली भएको छ । जहाजमा शीघ्र उपचारका लागि विराटनगर, काठमाडौं लैजान लागिएको मुटु, पत्थरिया, मृगौला रोगी समेत रहेको कान्तिपुरले खबर लेखेको छ ।
२४ माघ २०७२
वि.सं.२०७२ माघ २४ आइतवार १०:३४ मा प्रकाशित
