काठमाडौ। नेपाल विद्युत् प्राधिकरण र पिपल्स पावर लिमिटेडबीच विद्युत् खरिद सम्झौता(पिपिए )भएको छ । प्राधिकरणका निमित्त प्रबन्ध निर्देशक जगदीश्वरमान सिंह र प्रवद्र्धकका तर्फबाट कम्पनीका प्रबन्ध संचालक भरतबहाुर खत्रीले उक्त सम्झौतामा हस्ताक्षर गरेका हुन् । 
पिपुल्स पावर लिमिटेडको प्रबद्र्धनमा निर्माणाधिन ४.९६ मेगावाट क्षमताको पुवा–२ जलबिद्युत आयोजनाको बिद्युत् खरिद सम्झौता(पिपिए ) भएको हो । उक्त आयोजना इलामको माईपोखरी र साखेजुङ क्षेत्रमा पर्दछ ।
सम्झौतानुसार हिउँदमा ८ रुपैयाँ ४० पैसा र वर्षायाममा ४ रुपैयाँ ८० पैसा प्रतियुनिटका दरले प्राधिकरणले विद्युत् खरिद गर्नेछ । आयोजना आगामी दुई वर्षभित्र निर्माण सम्पन्न गरिने बताईएको छ ।
प्रतिमेगावाट १८ करोड रुपैयाँ लागत रहेको उक्त आयोजनाको कुल लागत ९० करोड रुपैयाँ रहने छ । तीस करोड रुपैयाँ शेयर लगानी र बाँकी ६० करोड रुपैयाँ विभिन्न बैंक तथा वित्तीय संस्थाबाट सहवित्तीयकरणबाट ऋण लिइने बताइएको छ ।
कम्पनीका प्रबन्ध सञ्चालक भरतबहादुर खत्रीका अनुसार आगामी एक वर्षभित्र ५० प्रतिशत निर्माण गरी स्थानीय बासिन्दा र नागरिकका लागि शेयर लगानीको ३० प्रतिशत प्राथमिक शेयर निष्काशन गर्ने लक्ष्य राखिएको छ ।
प्रकाशित मितिः २०७४ भदौ ६
वि.सं.२०७४ भदौ ६ मंगलवार ११:१० मा प्रकाशित
