काठमाडौ । नेको इन्स्योरेन्स कम्पनी र एन.बि. इन्स्योरेन्स कम्पनीको साधारण सभा आगामि असोज १० गते हुने भएको छ । नेकोले १० प्रतिशत बोनस सेयर तथा बोनसपछि कायम हुने पूँजीको दुई बराबर एक कित्ता अनुपातमा हकप्रद सेयर जारी गर्ने प्रस्ताव सहित नेपाल पर्यटन बोर्ड भुकृटीमण्डपमा बाइसौं साधारणसभा बोलाएको हो ।
इन्स्योरेन्स कम्पनीले ७ करोड १२ लाख ८९ हजार ५९९ रुपैयाँ बराबरको बोनस तथा बोनसमा लाग्ने कर वापत ३७ लाख ५२ हजार ८४ रुपैयाँ नगद लाभांश प्रस्ताव गरेको छ । साधारणसभामा भाग लिन र
प्रस्तावित बोनस प्राप्त गर्न भदौ २८ गतेसम्म सेयर किन्नुपर्ने हुन्छ वा उक्त मितिभन्दा अगाडि सेयरधनी रहेका लगानीकर्ताहरु सहभागि हुन सक्नेछन् ।
यस्तै एन.बि. इन्स्योरेन्स कम्पनीले बीमा समितिको निर्देशन अनुरुप चुक्ता पूँजी एक अर्ब पुर्याउन १० बराबर आठ कित्ता अनुपातमा हकप्रद जारी गर्ने प्रस्ताव गरेको छ । लैनचौर बैंक्वेटमा कम्पनीको २० औं बार्षिक सधारणसभा हुनेछ । कम्पनीको अधिकृत पूँजी दुई अर्ब रुपैयाँ पुर्याउने तथा कम्पनीको १८ औं र १९ औं बार्षिक साधारणसभाले प्रस्ताव गरेअनुरुप कम्पनीको नाम र लोगो परिवर्तन गर्ने लगायतका अन्य प्रस्ताव साधारणसभामा लगिंदैछ ।
भदौ २४ गतेसम्म सेयर किनेका वा उक्त मितिभन्दा अगाडि सेयरधनी रहेका लगानीकर्ताहरु साधारणसभामा सहभागि हुन सक्नेछन् ।
प्रकाशित मितिः २०७४ भदौ २०
वि.सं.२०७४ भदौ २० मंगलवार ११:२९ मा प्रकाशित
