सिलगुडी । भारतको उत्तरपूर्वी क्षेत्रमा क्रियाशील पर्यटन व्यवसायीले नेपालको पर्यटकीय नगरी पोखरामा भारतीय पर्यटकको आगमन बढाउन सीमा क्षेत्रसँग जोडिएका विमानस्थलमा पोखराबाट सिधा हवाई सम्पर्क हुनुपर्नेमा जोड दिएका छन् ।
नेपाल पर्यटन बोर्ड, क्षेत्रीय कार्यालय पोखराको आयोजना एवम् पोखरा पर्यटन परिषद्को संयोजनमा शनिबारदेखि उत्तरपूर्वी भारतमा सुरु भएको प्रवद्र्धनात्मक कार्यक्रमका क्रममा सिलगुडीमा आयोजित एक समारोहमा उक्त जोड दिइएको हो ।
कार्यक्रममा इष्टर्न हिमालयन ट्राभल्स एण्ड टुर अपरेटर एसोसिएसनका अध्यक्ष सम्राट सन्यालले पर्यटनको विकासका लागि कनेक्टिभिटी आवश्यक भएको बताउँदै पोखराबाट भारतका सीमा नजिकै रहेका विमानस्थलमा सिधा हवाई सम्पर्क हुनुपर्ने बताए ।
पोखरा आफैँमा सुन्दर नगरी भएको बताउँदै उहाँले यसको समग्र विकासका लागि पर्यटन सम्बद्ध संस्था र यहाँका व्यवसायी अग्रसर बन्नुपर्ने उल्लेख गरे ।
उत्तरपूर्वी भारतका पर्यटन व्यवसायी एवम् पर्यटन सम्बद्ध संस्थाहरू पोखरासँग पर्यटनमा साझेदारी गर्न तयार रहेको उनको भनाइ थियो ।
पोखरासँगको पर्यटनमा साझेदारी गर्ने उद्देश्यका साथ अघिल्लो वर्ष नेपाल पर्यटन बोर्ड क्षेत्रीय कार्यालय, पोखराको पहलमा इष्टर्न हिमालयन ट्राभल्स एण्ड टुर अपरेटर एसोसिएसन, भारत र पोखरा पर्यटन परिषद्बीच सम्झौतापत्रमा संयुक्त हस्ताक्षर गरिएको थियो ।
पोखराको पर्यटकीय विकासका लागि उक्त सम्झौता एउटा महत्वपूर्ण आधार बनेको नेपाल पर्यटन बोर्ड, पोखरा कार्यालयका वरिष्ठ अधिकृत सूर्य थपलियाले बताए ।
उनले यससँगै व्यावसायिक दक्षता अभिवृद्धि, संयुक्त प्रचारप्रसार, व्यावसायिक नेटवर्किङ, प्रवद्र्धनलगायतमा महत्वपूर्ण सहयोग पुग्ने विश्वास व्यक्त गरे ।
पोखरा पर्यटन परिषद्का अध्यक्ष केदार शर्माले पोखराको समग्र पर्यटकीय विकासका लागि प्रवद्र्धनात्मक भ्रमण बहुउपयोगी बन्ने विश्वास व्यक्त गरे ।
उत्तरपूर्वी भारतका पश्चिम बङ्गाल, आसाम, सिक्किम, मणिपुर, मेघालय, मिजोरमलगायतका राज्यबाट धेरै पर्यटक धार्मिक रुपले पनि नेपालको भ्रमणका लागि आउने गरेको पाइन्छ ।
पोखरा पर्यटन परिषद्का उपाध्यक्ष भरतराज पराजुलीले भारतीय पर्यटन व्यवसायीले पोखराको पर्यटनका लागि हवाई सम्पर्कका साथै अत्यावश्कीय पूर्वाधार विकासका लागि दिएको सुझावलाई कार्यान्वयनमा ल्याउनुपर्ने आवश्यकता औँल्याए ।
पर्यटनका पर्याप्त सम्भावना बोकेका स्थलमा सडक यातयातका साथै हवाई यातायात सेवा सहज गर्नु अपरिहार्य भएको बताउँदै उनले यसतर्फ राज्यको प्राथमिकता आवश्यक हुने उल्लेख गरे ।
प्रवद्र्धनात्मक कार्यक्रमका क्रममा भारतका डुवर्स, गान्तोकलगायतका स्थानका पर्यटन सम्बद्ध संस्थाका प्रतिनिधिसँग पनि छलफल एवम् अन्तक्र्रिया गर्ने कार्यक्रम रहेको उनले जानकारी दिए ।
२८ जेठ २०७४
वि.सं.२०७४ जेठ २८ आइतवार ०८:२४ मा प्रकाशित
