काठमाण्डौं । नेपाल धितोपत्र बोर्डले सेयर बजार अकल्पनीय रुपमा बढ्दै गएपछि गंभीर रुपमा सर्बसाधारण लगानीकर्ताहरुको नाममा सार्वजनिक अपील गर्दै सचेत भएर लगानी गर्न आब्हान गरेको छ । धितोपत्र बोर्डले यो दोस्रो पटक अपील गरेको हो ।
सोमबार नेप्सेले १३८४ को बिन्दु टेकेर फर्कि दुई अंक भन्दा बढीले बजार घटेको दिन सेयर बजारको सर्बोच्च नियमनकारी निकाय धितोपत्र बोर्डबाट यस्तो अपिल जारी भएको हो । आइतबार मात्रै नेप्से २० अंकले बढ्नुका साथै एक अर्ब १४ करोड बराबरको शेयर किनबेच भएको थियो । गत फागुन २७ गते पनि नेप्सेमा ठूलो कारोबार भई नेप्से बढेकोमा पहिलो पटक बोर्डले यसैगरी सजग गराएको थियो ।
बर्डका प्रबक्ता निरज गिरीले जारी गरेको बक्तब्यमा भुकम्प र तराई आन्दोलन आदिले गर्दा देशको अर्थतन्त्रमा नकारात्मक असर गरी देशको आर्थिक बृद्धिदर २ प्रतिशतको हाराहारीमा हुने अनुमान र सूचीकृत कम्पनीहरुको अबस्था पनि सन्तोषजनक नरहेको अबस्थामा अर्थतन्त्रको परिसूचक नेप्से गत असारको तुलनामा धेरै माथि आउनुले आफूहरुलाई सोच्न बाध्य बनाएको उल्लेख छ ।
बोर्डले हल्ला र आधारहिन अनुमानका पछाडि नलागी देशको बिद्यमान आर्थिक परिदृश्य, सूचीकृत संस्थाहरुको आधारभुत बिश्लेषण र जोखिम बहन गर्नसक्ने क्षमतालाई बिचार गरी सजग भएर लगानी गर्न लगानीकर्ताहरुमा आग्रह गरेको छ ।
बिज्ञप्तिमा धितोपत्र बोर्डले बजार बिकास तथा सुधारमा गरेको कार्यले यस प्रकारको बृद्धिलाई केही सहज गरे पनि देशको आर्थिक अबस्था र सूचीकृत कम्पनीहरुको बित्तीय अबस्था आदिलाई हेर्दा यस बृद्धिलाई सजगतापूर्वक लिनुपर्नेमा जोड दिईएको छ ।
१६ चैत २०७२, ८.००
वि.सं.२०७२ चैत १६ मंगलवार १०:३८ मा प्रकाशित
