काठमाडौ । कांग्रेसले म्यादभित्र डोल्पामा दल दर्ता गरेन । कारण डोल्पामा उसले स्थानीय तहको चुनाव लड्न नपाउने भएको छ । जिल्लामा जम्मा ६ दल मात्रै दर्ता भएका छन् ।
आयोगका अनुसार त्यहाँ एमाले, माओवादी केन्द्र, संघीय समाजवादी फोरम नेपाल, फोरम लोकतान्त्रिक, राष्ट्रिय जनमोर्चा र परिवार दल मात्र दर्ता भएका छन् ।
आयोगले दिएको समय सकिएपछि कांग्रेसले दल दर्ता छुटेको भन्दै निवेदन दिएको थियो । तर, आयोगले माघ १९ भित्र दर्ता छुट भएका जिल्लाहरुमा समावेश नगर्ने निर्णय गरेको छ ।
यस्तै राप्रपा पनि ९ जिल्लामा दर्ता नभएको पाइएको छ । मोरङ, सिराहा, महोत्तरी, धनुषा, रसुवा, बारा, लमजुङ, गोरखा र डोल्पामा राप्रपा दर्ता भएको छैन ।
आफूहरु महाधिवेशनमा केन्द्रीत हुँदा जिल्लाले दल दर्ता गर्न छुटाएको प्रवक्ता सुशीलकुमार श्रेष्ठले स्वीकार गरे । उनले भने, ‘पार्टी एकताको ३ महिनामै महाधिवेशन गर्यौं । सबै जना यता व्यस्त हुँदा केही जिल्ला कमिटीले दल दर्ता गर्न छुटाएछन् ।’
निर्वाचन आयोगले दिएको पुस २५ देखि माघ १७ भित्र दल दर्ता नगरेका राप्रपाले पछि दल दर्ता छुटेको भन्दै निवेदन दिएको थियो । तर, आयोगले माघ १७ भित्र दर्ता छुट भएका जिल्लाहरुमा समावेश नगर्ने निर्णय गरेको सचिव गोपी मैनालीले बताएका छन् ।
दर्ता नभएका जिल्लामा स्वतन्त्ररुपमा उठ्न सक्ने निर्वाचन आयोगले जनाएको छ ।
प्रकाशित मितिः २०७३ चैत ६
वि.सं.२०७३ चैत ६ आइतवार १७:५७ मा प्रकाशित