काठमाडौ । साताको नेप्से परिसूचक पहिलो दिनको तुलनामा ११.५२ अंकले घटेर अन्तिम दिन १६५३.५३ अंकमा पुगेको छ । यस साता नेपाल स्टक एक्सचेन्जमा १६८ कम्पनीहरुको कारोबार भएको हो ।
जस अनुसार ३४७७३ कारोबारबाट तीन अर्ब ८१ करोड ८४ लाख ६० हजार रुपैयाँ बराबरका एक करोड २१ लाख तीन हजार पाँच सय ८० कित्ता सेयरहरु खरिद बिक्री भएका छन् । कारोबार रकम गत साताको भन्दा २७.३० प्रतिशत कम हो ।
गत साता १६७ कम्पनीहरुको कारोबार भएको थियो । जस अनुसार ४४४८८ कारोबारबाट पाँच अर्ब २५ करोड २४ लाख १५ हजार रुपैयाँ बराबरका एक करोड पाँच लाख ८० हजार चार सय ९० कित्ता सेयरहरु खरिद बिक्री भएका थिए ।
‘क’ वर्गका कम्पनीहरुको कारोबार मापन गर्ने सेन्सेटिभ परिसूचक पहिलो दिनको तुलनामा २.०८ अंकले घटेर ३४७.०३ अंकमा आईपुगेको छ । यस साता कारोबार रकम (१९ करोड ५३ लाख १० हजार रुपैयाँ) को आधारमा नागरीक लगानी कोष अग्रस्थानमा रहेको छ । त्यसैगरी कारोबार भएको सेयर संख्या (३१ लाख २७ हजार कित्ता) को आधारमा सिद्धार्थ इन्भेस्टमेन्ट ग्रोथ स्किम १ अग्रस्थानमा रहेको छ । त्यसैगरी कारोबार संख्या (१७६१ वटा) को आधारमा नेपाल लाइफ इन्स्योरेन्स कम्पनी लिमिटेड अग्रस्थानमा रहेको छ ।
प्रकाशित मितिः २०७४ साउन २८
वि.सं.२०७४ साउन २८ शनिवार १२:०६ मा प्रकाशित
