काठमाडौं । बैंक र बीमा समूहले तानेपछि बजार बन्द हुने बेलामा सेयर बजार परिसूचकहरु हरियो रंगले पोतिए । बजार खुल्नासाथ सामान्य वृद्धि देखिएपनि अधिकांस समय सूचक रातो रंगमा परिणत भएको थियो । अन्तिम समयमा बैंकमा लगानीकर्ता तानिए र बजारलाई माथि उठाए ।
१.८८ अंकको वृद्धि र करिब एक अर्ब २० करोड रुपैयाँको सेयर कारोबार गर्दा बाणिज्य बैंक र बीमा समूहको दबदबा कायमै रह्यो । बाणिज्य बैंक समूहको सूचक र कारोबार अन्तिम समयमा मात्रै बढेको हो । सनराइज् बैंक, सिटिजन्स बैंक, नेपाल बंगलादेश, एभरेष्ट, एनआईसी एशिया जस्ता बैंकले सोमबारको बजारलाई लिड गरे । सबैभन्दा बढी सनराईज बैंकको ६ करोड ६८ लाख रुपैयाँको सेयर किनबेच भयो ।
सिटिजन्स बैंक र एनआईसी बैंकको हकप्रद तथा बोनस नेपाल राष्ट्र बैंकबाट स्वीकृत भएको र बुक क्लोज हुने सूचनाले पनि कारोबार रकम तथा मूल्यमा केही असर गरेको हो ।
हकप्रद घोषणा गरेको लक्ष्मी लघुवित्तका लगानीकर्ता सबैभन्दा बढी कमाउनेमा परेका छन् । यो कम्पनीका लगानीकर्ताले ८.५८ प्रतिसतका दरले कमाएका छन् । सानिमा बैंकका लगानीकर्ताले ४.८१ प्रतिसतका दरले कमाएका छन् ।
कारोबार भएका मध्ये चार वटा समूह बाणिज्य बैंक, होटल, विकास बैंक र इन्स्योरेन्सका लगानीकर्ताले कमाएका छन् । जलबिद्युत् र फाइनान्स समूहका लगानीकर्ताले भने गुमाए। अन्य समूह यथावत रह्यो ।
प्रकाशित मितिः २०७३ भदौ २७
वि.सं.२०७३ भदौ २७ सोमवार २१:०९ मा प्रकाशित