काठमाडौँ। दुइ साताको लगातार गिरावट पछि बजार १४१४.७८ अंकमा झरेको छ । पछिल्लो दुईसातामा बजारले १०५ अंक गुमाएको छ। साताको अन्तिम दिन बिहीबार नेपाल स्टक एक्सचेन्जको कारोबार मापक सूचक १०.७३ अंकले घटेर १४१४.७८ अंकमा पुगेको छ।
कारोबारको सुरुवात १४२४ अंकबाट गरेको बजारले सवा एक घण्टामा १५ अंक गुमाउदै १४०९.४३ अंक छोएको थियो। त्यसपछि बढेको बजारले तीन अंक बढेर एक बजे १४२७ अंक सम्म भेट्टाएको थियो। केहि समय बढेको बजारले आफ्नो वृद्धि कायम गर्न नसक्दा बजार घटेर बन्द भएको छ।
प्रारम्भिक कारोबारमा खरिदकर्ता कम देखिएको बजारमा सुधार हुन थालेपछि कारोबार बढ्दा समग्र कारोबार रकममा सुधार देखिएको हो। बिहीबार सबैभन्दा बढी स्ट्याण्डर्ड चार्टड बैंकको २२ करोड ८० लाख रुपैयाँको कारोबार भयो। बिहीबार स्ट्याण्डर्ड चार्टड बैंकले घोषणा गरेको शतप्रतिशत लाभांश सुरक्षित गर्ने अन्तिम दिन भएकोले लगानीकर्ता उक्त कम्पनीमा आकर्षित भएका हुन्।
लगातारको गिरावट पछी सूचक १० महिना पछाडिको बिन्दुमा धकेलिएको छ। बिगत १० महिना अघि गत चैत ६ गते बजार मापक सूचक १३८२.८२ अंकमा थियो।
बिहीबार १६२ कम्पनीका १८ लाख ६१ हजार कित्ता शेयर ८१ करोड रुपैयाँमा कारोबार भयो। यो अघिल्लो दिनको तुलनामा ६ करोड रुपैयाँ बढी हो। बुधबार करिब ७६ करोड रुपैयाँको कारोबार भएको थियो। तिब्र गतिमा घटेको बजार सुधार उन्मुख भए लगत्तै खरिद बिक्री बढेको थियो।
कारोबारमा आएका १० उपसुचाक तीन उपसूचक बढेका छन् भने सात उपसूचक घटेका छन्। ट्रेडिङ २.५२, होटल ०.३४ र अन्य ०.१४ प्रतिशतले बढेका छन्। बैंक १.३३, विकास बैंक ०.७८, जलबिद्युत ०.३४, फाइनान्स ०.०८, बीमा ०.०५, उत्पादनमुलक ०.०२ र लघुवित्त ०.१८ प्रतिशतले घटेका छन्।
२०७४ पुष १३ गते प्रकाशित
वि.सं.२०७४ पुस १३ बिहीवार १७:२८ मा प्रकाशित
