काठमाडौ ।सोमबार नेपाल स्टक एक्सचेन्जमा ७८ करोड ९ लाख रुपैंया भन्दा माथिको कारोबार भएको छ । दिनभरिमा एक सय ३१ वटा कम्पनीको चार हजार एक सय ७८ कारोबारबाट आठ लाख ५६ हजार छ सय ८८ कित्ता सेयर खरिदबिक्री भए । आइतबारको तुलनामा यो कारोबार रकम बढेको हो । आइतबार ७३ करोडभन्दा बढिको कारोबार भएको थियो ।
कारोबार रकमसँगै नेप्से परिसुचकमा पनि सुधार देखियो । सोमबारको नेप्से ६.२८ अंकले बढेर १७०६.२८ अंकमा कायम भएको छ । बाणिज्य बैंक, होटल, फाइनान्स, बीमा, उत्पादनमूलक समूहले सोमबारको बजारलाई उचालेका छन् । सबैभन्दा धेरै बीमा समूह ४३.२५ अंकले बढेको छ भने उत्पादनमूलक समूह १२.५५ अंकले बढेको छ । बजारको अधिकाँस हिस्सा ओगट्ने बाणिज्य बैंक समूहको परिसूचक ८.९४ अंकले बढेको छ । त्यस्तै फाइनान्स र होटल क्रमशः ७.६२ र ७.०९ अंकले बढेका छन् । विकास बैंक, जलविद्युत् र अन्य भने क्रमशः ५.२८, ३.५६ र १.४५ अंकले घटेका छन् ।
आइतबार जस्तै सोमबार पनि लगानीकर्ताको चाप एभरेष्ट बैंकमा नै रह्यो । एभरेष्ट बैंकको १२ करोड ३५ लाख रुपैंयाभन्दा बढिको कारोबार भएको छ ।
यस्तै नेशनल लाइफ इन्स्योरेन्स कम्पनीको पौने आठ करोड, शिखर इन्स्योरेन्सको पनि छ करोडमाथिको कारोबार भएको छ । बैंक अफ काठमाण्डू लुम्बिनी र सिद्धार्थ बैंकको चार करोडमाथिको कारोबार भएको छ भने सिभिल बैंकको दुई करोड ६६ लाख रुपैयाँको कारोबार भएको छ ।
नेपाल लाइफ इन्स्योरेन्स र एनएमबी बैंकको अढाई करोडमाथिको कारोबार भएको छ । स्टान्डर्ड चार्टर्ड बैंकको झन्डै दुई करोडको कारोबार हुँदा कुमारी बैंकको डेढ करोडको कारोबार भएको छ । शुभेच्छा विकास बैंकलाई गाभेर सोमबारदेखि नै सेयर कारोबार सुरु गरेको गरिमा विकास बैंकका सेयरधनीले ९.८३ प्रतिशतका दरले कमाएका छन् ।
प्रकाशित मितिः २०७३ कार्तिक २९
वि.सं.२०७३ कात्तिक २९ सोमवार १५:५६ मा प्रकाशित
