काठमाण्डौं । नेरुडे लघुवित्त विकास बैंकको ५० प्रतिशत हकप्रद चैत १४ गते सोमबारदेखि खुला भएको छ । कम्पनीले २ः१ अनुपातमा प्रतिकित्ता एक सय रुपैयाँ अंकित दरको ९ लाख कित्ता हकप्रद सेयर बिक्री खुला गरेको हो ।
कम्पनीको सेयर निष्काशन तथा बिक्री प्रवन्धकमा एनसीएम मर्चेन्ट बैंकिङ रहेको छ । हकप्रदमा बिक्री प्रबन्धकको कार्यालय कमलपोखरी काठमाडौं तथा नेरुडे लघुवित्तको कार्यालय विराटनगर मोरङबाट आवेदन प्राप्त गर्न र बुझाउन सकिनेछ । हकप्रद सेयरमा बैशाख १७ गतेसम्म आवेदन दिन पाइने छ ।
काठमाडौंमा सोमबार घोडेजात्राका कारण सार्वजनिक विदा परेका कारण मंगलबारबाट मात्र सेयरधनीले हकप्रद भर्न पाउनेछन् भने लघुवित्तको कार्यालय विराटनगरमा भने सोमबारदेखि नै आवेदन गर्न सक्नेछन् ।
नेरुडेको हाल चुक्ता पुँजी १८ करोड रुपैयाँ छ । हकप्रद सेयर बिक्रीपछि नेरुडेको चुक्ता पुँजी २७ करोड रुपैयाँ पुग्नेछ । कम्पनीको बोनस समेत गर्दा ३० करोड ६० लाख रुपैंया पुग्नेछ । कम्पनीका अनुसार, फागुन २९ गतेसम्म सेयर किनेका लगानीकर्ताले हकप्रद भर्न पाउनका साथै २० प्रतिशत बोनस तथा ११.०५ प्रतिशत नगद लाभांश समेत प्राप्त गर्नेछन् ।
१४ चैत २०७३, १२।००
वि.सं.२०७३ चैत १४ सोमवार १२:२७ मा प्रकाशित