काठमाण्डौं । नेपाल इन्भेष्टमेन्ट बैंकसहित ८ कम्पनीका २ करोड ७ लाख कित्ता सेयर बजारमा थपिएको छ। कम्पनीका साधारण, बोनस र हकप्रद सेयर बजारमा सूचीकृत भएको हो। सबैभन्दा बढी नेपाल इन्भेष्टमेन्ट बैंकको १ करोड ५७ लाख ७३ हजार ६ सय ७५ कित्ता बोनस सेयर थपिएको छ।
सो कम्पनीको ९० लाख कित्ता साधारण एफपीओ सेयर पनि बजारमा चाँडै नै सूचीकृत हुने छ। हाल कम्पनीको सेयर बाँडफाँडमा नपरेको रकम फिर्ता भइरहेको छ।
यो साता रिलायन्स लोटस फाइनान्सको ५ लाख १४ हजार २ सय ८६ कित्ता साधारण सेयर बजारमा थप भएको छ। यसअघि कम्पनीले जारी गरेको एफपीओ सेयर यो साता मात्रै बजारमा सूचीकृत भएको हो।
त्यस्तै काबेली विकास बैंकको १ लाख ७२ हजार र गण्डकी विकास बैंकको १० लाख ५६ हजार कित्ता सेयर थप भएको नेपाल स्टक एक्सचेन्जले जनाएको छ।
एस डेभलपमेन्ट बैंकको ११ लाख ५० हजार ९ सय ५ कित्ता, कामना विकास बैंकको ११ लाख ११ हजार ९ सय ५८ कित्ता, काबेली विकास बैंकको ६८ हजार ८ सय कित्ता बोनस सेयर सूचीकृत भएको छ। डिप्रोक्स लघुवित्त विकास बैंकको ८ लाख ५९ हजार ७ सय ४६ कित्ता बोनस सेयर पनि बजारमा थपिएको छ।
१७ बैशाख २०७३, १.००
वि.सं.२०७३ वैशाख १७ शुक्रवार १५:११ मा प्रकाशित
