राजविराज । उपप्रधानमन्त्री गच्छदारले निर्वाचन आयोगले पनि सरकारलाई काम गर्न नदिएको बताए । शनिबार राजविराजमा पत्रकार सम्मेलन गर्दै उपप्रधानमन्त्री गच्छदारले तराई रमधेसका जिल्लामा ५ वटासम्म क्षेत्र घटाएको बारेमा आफूले जोडदार रुपमा आवाज उठाउने बताए ।
गच्छदारले भने ‘निर्वाचन क्षेत्र निर्धारण आयोगले क्षेत्र निर्धारण गर्दा आफूहरुसँग सरसल्लाह, छलफल गरेको छैन,’ उनले भने, ‘आयोगको प्रतिवेदनप्रति हामीहरुलाई चित्त बुझेको छैन ।’
संविधानको मर्म र भावना विपरीत जातिय क्लस्टरलाई भत्काएर निर्वाचन क्षेत्र निर्धारण गरिएको उनले बताए ।
‘आयोगले तीन महिना अघि नै आचार संहिता लागू गरेर सरकारको कामकाजलाई प्रभावित बनाएको छ,’ उनले भने, ‘यसलाई सच्याउनु जरुरी छ ।’
मुलुकै इतिहासमा अहिलेसम्म यति लामो आचारसंहिता लागू नभएको बताउँदै उनले यसले सरकारकौ दैनिक कामकाजमा समेत प्रभाव परिरहेको बताए ।
नेपाल लोकतान्त्रिक फोरमका केन्द्रीय अध्यक्ष समेत रहेका गच्छदारले मंसिर २१ गते हुने चुनावका लागि अहिले नै आचार संहिता लागू गर्न उचित नभएको बताए ।
स्थानीय तहको तेश्रो चरणको चुनाव प्रदेश नं. २ मा असोज २ गते हुन लागेको सन्दर्भ उठाउँदै गच्छदारले चुनावपछि अधिकार सम्पन्न स्थानीय तह निर्माणको चरण पूरा हुने विश्वास ब्यक्त गरेका छन् ।
प्रकाशित मितिः२०७४ भाद्र १७
वि.सं.२०७४ भदौ १७ शनिवार १४:३६ मा प्रकाशित