काठमाडौ । ओम डेभलपमेन्ट बैंकले ३० प्रतिशत हकप्रद जारी गर्न भदौ ३० मा बुक क्लोज गर्ने भएको छ । त्यसैले भदौ २९ गतेसम्म कायम सेयरधनीले मात्र यस हकप्रदमा आवेदन दिन सक्नेछन् ।
बैंकले ३० प्रतिशत हकप्रद निष्काशनको लागि धितोपत्र बोर्डबाट अनुमति पाइसकेको छ । अब ओमले १०ः३ अनुपातमा प्रतिकित्ता १०० रुपैयाँ दरको ४९ लाख ३१ हजार ८३५ कित्ता हकप्रद सेयर बिक्री खुला गर्नेछ । ओमको बिक्री प्रबन्धक एनआइबीएल क्यापिटल मार्केट्स लिमिटेड रहेको छ ।
राष्ट्रियस्तरको विकास बैंकलाई राष्ट्र बैंकले २ अर्ब ५० करोड रुपैयाँ चुक्ता पुँजी पुर्याउन निर्देशन दिएपछि ओमले हकप्रदको बाटो रोजेको हो । पुँजी बृद्धिकै लागि ओम र मनास्लु विकास बैंक एक आपसमा गाभिएर असार २ गतेदेखि एकीकृत कारोबार पनि सुरु गरिसकेका छन् । मनास्लु गाभिएपछि ओमको चुक्ता पुँजी १ अर्ब ६४ करोड ३९ लाख ४४ हजार ७९५ रुपैयाँ पुगेको छ । बैंकले यही चुक्ता पुँजीको ३० प्रतिशत हकप्रद सेयर जारी गर्न अनुमति पाएको हो ।
प्रकाशित मितिः २०७४ भदौ २२
वि.सं.२०७४ भदौ २२ बिहीवार १३:०० मा प्रकाशित