काठमाण्डौं । ओम डेभलपमेन्ट बैंक र मनास्लु विकास बैंक दुबैले एक आपसमा गाभ्ने गाभिने र मर्ज पश्चात ३० प्रतिशत हकप्रद निष्काशन गर्ने मुख्य प्रस्ताव राखेर चैत १ गते विशेष साधारणसभा डाकेका छन् । पोखरामा केन्द्रीय कार्यालय रहेको ओम र गोर्खामा मुख्य कार्यालय रहेको मनास्लु एक आपसमा मर्ज हुन लागेका हुन् । मर्ज गर्ने प्रयोजनका लागि उनीहरुले पाँच बर्षे व्यवसायिक योजना तथा सर्वेक्षण समेत पारित गर्देछन् ।
हाल ओमको चुक्ता पूँजी एक अर्ब ३६ करोड र मनास्लुको चुक्ता पूँजी ३० करोड रुपैँया रहेको छ । मर्जर पश्चात बैंकको चुक्ता पूँजी एक अर्ब ६४ करोड ३९ लाख रुपैँया चुक्ता पूँजी पुग्नेछ । बैंकले प्रस्ताव गरेको ३० प्रतिशत हकप्रद सेयर जारीपछि बैंकको चुक्ता पूँजी दुई अर्ब १३ करोड ७० लाख रुपैँया पुग्नेछ । त्यसपछि चालु आर्थिक बर्षको कमाईबाट दिईने बोनसबाट चुक्तापूँजी २ अर्ब ५० करोड पुर्याउने योजना बैंकको रहेको छ ।
राष्ट्रिय स्तरको ओम डेभलपमेन्ट बैंकको २६ वटा शाखा रहेका छन् भने नयाँ ५ वटा शाखा खोल्न नेपाल राष्ट्र बैंकबाट स्वीकृति पाएको छ । मनास्लुको नौ शाखा रहेका छन् ।
१५ फागुन २०७३, ११।००
वि.सं.२०७३ फागुन १५ आइतवार १२:१३ मा प्रकाशित
