चितवन । कृषिको विकास गर्ने जिम्मेबारी लिएको कर्मचारीकै मिलोमतोमा चितवनमा धानको बीउमा व्यापक रुपमा कालोबजारी भइरहेको छ । चितवनको नारायणगढ लगायतका बजार क्षेत्रमा अहिले धानको बीउमा कालोबजारी भईरहेको फेला परेको छ ।
धानको बीउ लगाउने मौसम शुरु भएसँगै बीउमा ब्यापक कालोबजारी भईरहेको हो । चितवनको नारायणगढ, भरतपुर, टाँडी, पर्सा, खोलेसिमल, भण्डारा, चनौली, गितानगर, माडि र नवलपरासीको गैडाकोट, कावासोती डण्डालगायत देशैभरका बजारमा विक्रीमा राखिएका धानका बीउमा सामान्य मूल्यभन्दा दशौं गुणा मुल्य बढाएर बिक्री भइरहेको छ । भारतीय कम्पनीको लोकनाथ ५०५ र गोरखनाथ ५०९ लगायतका धानका बीउ हाईव्रिड नभए पनि हाईब्रिडको मूल्यमा स्थानीय बजारमा बिक्री भईरहेको श्रोतले जनाएको छ ।
यसरी कर्मचारीको सेटिंगमा हुन्छ कालोबजारी
श्रोतका अनुसार गोरखनाथ बायोजिन्स इण्डिया लिद्धारा उत्पादित धानका बीउ लोकनाथ र गोरखनाथ हाईब्रिड नभए पनि हाईब्रिडको मुल्यमा विक्रि भईरहेको छ । सामान्य उन्नत वा लोकल जातका धानको विउको बजार मुल्य ३० देखि ५० रुपैयाँसम्म पर्छ, तर त्यही प्रकारको लोकनाथ र गोरखनाथ धानको बीउको बजार मूल्य ३ सय रुपैयाँभन्दा बढी छ ।
लोकनाथ र गोरखनाथ बीउलाई हाईब्रिड भन्दै जिल्ला कृषि विकास कार्यालय भरतपुरका भ्रस्ट कर्मचारीको मिलोमतोमा महँगो मूल्यमा नेपालका बजारहरुमा बिक्री भइरहेको छ । कृषि विकास मन्त्रालय अन्तर्गतको बिउविजन केन्द्र हरिहर भवन र जिल्ला कृषि विकाश कार्यालयको आँखामा धुलो हाल्दै खुलेआम रुपमा उक्त बीउको बिक्री बितरण भइरहेको छ ।
हाईब्रिडको मुल्यमा सामान्य जातको धानको बिउ विक्रि गर्नु भनेको ब्यापारीहरुलाई सरकारी निकायले पोसेको प्रस्टै देखिन्छ । नेपाल उपभोक्ता अधिकार मञ्च चितवनका अध्यक्ष कपिल पाण्डेले कालोबजारी भईरहेको उक्त धानको बिउ जफत गर्नुपर्ने सुझाव दिए ।
पाण्डेकाले कालो बजारीलाई रोक्न प्रशासनले अबिलम्ब अनुगमन गरी दोषिमाथि कारवाही गर्नुपर्ने माग गरेका छन् । जिल्ला प्रशासन कार्यालयका बजार संरक्षण अधिकृत ओमनारायण शर्माले चुनावको कारण केही दिन यतादेखि अनुगमन रोकिएको जानकारी दिए । उनले यसै साता अनुगमन गरेर बजार नियन्त्रण गर्ने दावी गरे ।
यसअघि गुणस्तरहिन मकैको बीउ बिक्री बितरण गरेको भन्दै स्थानीय प्रशासनले बायोजिन्स ईण्डिया लिमिटेडलाई कारवाही गरेको थियो । अहिले सोही कम्पनीले लोकनाथ र गोरखनाथ भन्ने धानको बीउ नेपालमा भित्र्याएको हो । यसरी बर्षौदेखि उक्त कम्पनीले ठगि गरिरहे पनि कृषि बिभाग, जिल्ला कृषि विकाश कार्यालय र जिल्ला प्रशासन मौन छ । न्यूजएग्रोडटकमबाट
प्रकाशित मितिः २०७४ जेठ २८
वि.सं.२०७४ जेठ २८ आइतवार १४:०७ मा प्रकाशित