काठमाण्डौं। नेपाल भर यस वर्ष बाख्रा, खसी तथा बोकाको संख्या एक करोड दुई लाख छ । यस तथ्यांकले आगामी दुई वर्षमा मासुमा आफैमा आत्मनिर्भर हुने सरकारी लक्ष्य हासिल नहुने देखिएकोछ ।
गत वर्षपनि बाख्रा, खसी तथा बोका एक करोड दुई लाख नै थिए । कुखुरा भने २२ लाख थपिएको अनुमान छ । यस वर्ष कुखुराको संख्या पाँच करोड २२ लाख पुगेको छ । आर्थिक बर्ष २०७२/७३ मा गाई तथा गोरुको संङ्ख्या गत आर्थिक बर्षको तुलनामा ०.००३ प्रतिशतले बढेर करिव ७२ लाख ४२ हजार पुग्ने अनुमान रहेको छ।
हाल नेपालमा दुध दिने गाईको संङ्ख्या दशलाख २६ हजार रहेको छ भने यसमा उन्नत गाईको सङ्ख्या बढिरहेको पशुविकास मन्त्रालयले जनाएको छ। त्यस्तै भैसीको संख्या पनि बृद्धि हुने अनुमान रहेको छ तर दुध दिने भैसीको संङ्ख्या भने ०.१ प्रतिशत घट्ने अनुमान गरिएको छ। अर्थमन्त्रालयले सार्वजनिक गरेको आर्थिक सर्वेक्षण अनुसार अघिल्लो बर्षको तुलनामा बाख्रा बोकाको संङ्ख्या भने ०.०५ प्रतिशतले बढ्ने अनुमान गरिएको छ भने सुँगुरको संङ्ख्या ०.५ प्रतिशतले बढ्ने जनाइएको छ।
चालु आर्थिक बर्षमा कुखुराको संङ्ख्या अधिल्लो बर्षको तुलनामा ४ प्रतिशतले बढेर पाँच करोड २२ लाख पुग्ने अनुमान गरिएको छ। चालु आर्थिक बर्षमा कुल अण्डा उत्पादन गत बर्षको तुलनामा ३.५ प्रतिशतले वृद्धि भई ९४ करोड ८४ लाख वटा उत्पादन हुने अनुमान गरिएको छ। जसमध्ये कुखुरावाट ९३ करोड ४७ लाख वटा र हाँसवाट एक करोड ३७ लाख वटा रहेने अनुमान रहेको छ।
१४ जेठ २०७३, १०।००
वि.सं.२०७३ जेठ १४ शुक्रवार ११:३४ मा प्रकाशित
