खोटाङ । खोटाङको खोटेहाङ गाउँपालिका–४ बड्कादियालेमा रहेको थामखर्क विमानस्थलमा कालोपत्रेका काम थालिएको छ । नेपाल नागरिक उड्यान प्राधिकरणको ९ करोड २५ लाख २९ हजार लागतमा ठेकेदार कम्पनी रौता कन्ट्रक्सनले कालोपत्रेका प्रारम्भिक चरणका काम सुरु गरेको हो ।
कालोपत्रेका काम सुरु गरिएसँगै थामखर्कमा चैत्र १३ गतेदेखि उडान रोकिएको छ । हाल विमानस्थलमा कालोपत्रेका लागि रन–वेमा ग्राभेलिङका काम भइरहेको थामखर्क बिमानस्थलका स्टेशन ईन्चार्ज नरेन्द्र उदासले बताए ।
दशैं तिहारमा आवत जावत गर्ने यात्रुको सहजतालाई मध्यनजर गर्दै आउँदो दशैँसम्ममा ग्राभेलिङका काम पूरा गर्नेगरी काम भइरहेको छ । ग्राभेलिङका काम सकिएपछि दशैंतिहारको आसपासमा उडान गरेर माघदेखि धानवमार्गमा कालोपत्रे राख्न सुरु गरिने ठेकेदार कम्पनीले बताएको छ । २०७२ सालमा डिटेल सर्भे गरिएको विमानस्थलको कालोपत्रेका लागि आर्थिक वर्ष २०७२÷०७३ मा साँढे पाँच करोड रुपैयाँ बजेट छुट्टिएको थियो ।
दक्षिणी क्षेत्रका सर्वसाधरणलाई लक्ष्यीत गरेर २०५६ सालबाट उडान सुरु गरिएको विमानस्थल कालोपत्रे नहुँदा वर्षा याम लागेसँगै अवरुद्ध हुने गरेको छ । थामखर्क बिमानस्थल दुई वर्षमा पूरा गर्नेगरी ठेकेदार कम्पनीले जिम्मा लिएका हुन् । रौता कन्ट्रक्सनले कालोपत्रेका काम ठेकेदार महेश रेग्मीको जिम्मामा छाडेको छ ।
थामखर्क बिमानस्थलबाट जिल्लाका दक्षिणी क्षेत्रका २० गाविस सहित छिमेकी जिल्ला भोजपुरका केही गाबिसका सर्वसाधरण समेत लाभान्बित हुँदैआएको छ । सडक यातायातको सुविधा नपुगेको त्यसक्षेत्रमा थामखर्क बिमानस्थल एक मात्र यातायातको बिकल्पकारुपमा रहेको छ । बाह्रै महिना उडान नहुने भएका कारण त्यस क्षेत्रका सर्वसाधरणले विरामी भएको समयमा अकालमा धेरैले ज्यान गुमाउनुपर्ने बाध्यता छ ।
थामखर्कमा उडान नहुँदा त्यसक्षेत्रका सर्वसाधारण दुई दिनको पैदल यात्रा गरेर सदरमुकाम दिक्तेल नजिक रहेको खानीडाँडा विमानस्थल प्रयोग गर्न बाध्य छन् । जिल्लामा थामखर्क सहित खानीडाँडा र लामीडाँडा विमानस्थल छन् ।
प्रकाशित मितिः २०७४ बैशाख १२
वि.सं.२०७४ वैशाख १२ मंगलवार १७:१७ मा प्रकाशित
