काठमाडौ। राजधानीका सडकमा धुलो अत्यधिक बढेको र नागरिकहरुको स्वास्थ्यमा प्रतिकुल प्रभाव परेकोे जनगुनासो बढ्न थालेपछि प्रधानमन्त्री पुष्पकमल दाहाल प्रचण्ड आफैं कुचो लिएर सडक बढार्न निस्कने तयारीमा जुटेका छन् ।
राजधानीमा धुलो र धुँवाका कारण प्रदुषण उच्च स्तरमा पुगेको भन्दै यो तयारीमा प्रचण्ड पुगेको बताईएको छ । सरकारले यस अभियानमा जनतालाई पनि झाडु बोकेर सडकमा आउन अपिल गर्नेछ ।
प्रधानमन्त्री तथा मन्त्रिपरिषद कार्यालयका अनुसार अबको केही दिनमा नै ‘१५ मिनेट घर बाहिर निस्क्यौं’ अभियान थालिंदैछ । नागरिकले माक्स लगाएर कुचो बोकेर धुलो सफा गर्नुपर्नेछ । त्यसरी जम्मा भएको धुलो तोकिएको ठाउँमा राख्नु पर्नेछ र नगरपालिकाले व्यवस्थापन गर्नेछ
रेग्मीका अनुसार धुँवाधुलोका कारण श्वास प्रश्वासमा समस्या बढेको भन्दै प्रधानमन्त्री कार्यालयमा दिनहुँ गुनासो बढिरहेको छ । हेलो सरकारमार्फत राजधानीको धुलो नियन्त्रण नगर्दा श्वास प्रश्वासमा गम्भीर समस्या देखिएको भन्दै उजुुरी आएको छ ।
हेलो सरकारले फेसबुक र ट्वीटरबाट नागरिकसँग धुलो नियन्त्रणका लागि सुझाव पनि मागेको थियो । कार्यालयका अनुसार प्रधानमन्त्रीले झाडु लिएर धुलो बढार्नेछन् । र यो अभियानको सुरुवात गर्नेछन् । आम नागरिकलाई पनि हरेक दिन १५ मिनेट आफ्नो वरपरको धुलो सफा गर्न अपिल गरिनेछ ।
धुलो बढार्ने यो अभियानमा नेपाली सेना, नेपाल प्रहरी, सशस्त्र प्रहरी, शिक्षक, निजामती कर्मचारीलाई अनिवार्य संलग्न गराइने बताईएको छ ।
फाईल फोटो
प्रकाशित मितिः २०७३ माघ ५
वि.सं.२०७३ माघ ५ बुधवार १४:०५ मा प्रकाशित
