कास्की । नेपाली नयाँ बर्षको स्वागतार्थ पोखरामा आज मंगलबारदेखि फेवा नव बर्ष महोत्सव सुरु भएको छ । यो महोत्सवको आयोजना पश्चिमाञ्चल होटल संघले गरेको हो । आजबाट बैशाख २ गतेसम्म फेवा किनारको कोमागाने पार्कमा महोत्सव हुनेछ ।
महोत्सवको उदघाटन होटल एशोसियसन अफ नेपालका केन्द्रीय अध्यक्ष अमरमान शाक्यले गर्नेछन् भने त्यसअघि झाँकीसहितको र्याली निकालिनेछ । खहरेचोकदेखी शुरु हुने र्याली हल्लनचोक, बराहीचोक हुँदै कोमागाने पार्कमा पुगेर उद्घाटन समारोहमा परिणत हुनेछ ।
“फेवातालको संरक्षण गरौं” भन्ने मूल नाराका साथ आयोजना हुने १४ औं संस्करणको फेवा नव वर्ष महोत्सवमा पर्यटन, संस्कृति र खाना मुख्य आकर्षणका रुपमा रहने आयोजकले बताएका छन् ।
महोत्सवमा पाँचतारे होटलदेखि स्थानीय क्षेत्रमा पाइने सबै प्रकारका खानाहरु एकै ठाउँमा पाइने, प्रत्येक दिन सांगीतिक सांस्कृतिक कार्यक्रम, राष्ट्रिय स्तरको लोकदोहोरी गीत प्रतियोगिता, पप कन्सर्ट लगायतका कार्यक्रम हुने छन् ।
त्यस्तै, वाल उद्यान तथा मनोरञ्जनात्मक कार्यक्रम, वैंक तथा बित्तीय संस्थाहरुको स्टलहरु रहने, हास्य कलाकारहरुको प्रस्तुति, कृषि उपज स्टलहरु निःशुल्क प्रदर्शन लगायतका महोत्सवको आकर्षणका रुपमा रहने जनाइएको छ ।
महोत्सव न्यू इयर इभको दिन राति साढे १२ बजेसम्म सञ्चालन हुनेछ भने अन्य दिन राति १० बजेसम्म सञ्चालन हुने आयोजकले जनाएको छ । महोत्सव स्थलसम्म आवतजावतका लागि महोत्सव सञ्चालन हुने समयसम्मै सार्वजनिक सवारी साधनले सेवा दिनेगरी ब्यबस्था मिलाइएको छ ।
२९ चैत २०७३, ७।००
वि.सं.२०७३ चैत २९ मंगलवार ०८:४७ मा प्रकाशित