काठमाडौं । लगातारको बर्षाले आलु खेती प्रभावित भएपछि भारतले आलुमा कर बढाउँदै निर्यात शुल्क बढाएको छ । यसको सिधा असर नेपाली बजारमा परेको छ भने यसले हिजोबाट आलुका भाउ बढाएकोछ ।
यो महिना मात्रै भारतीय बजारमा आलुको खुद्रा मूल्य प्रति किलो सात रुपैयाँसम्म वढेको छ । आलु महँगिन थालेपछि मूल्य वढाउनु परेको सरकारी अधिकारीहरुले जानकारी दिएका छन् ।
भारत सरकारले आन्तरिक बजारमा आलुको माग वढेको भन्दै त्यसको निर्यातलाई निरुत्साहित गर्न न्युनतम निर्यात मूल्य (एमइपि) लगाउने निर्णय गरेको छ । विदेश ब्यापार महानिर्देशनालयले हिजो मंगलबारबाट निर्यातमा शुल्क लगाएको हो । अब एक टन आलु निर्यातमा ३६० डलर एमइपि लाग्ने छ । एमइपि लगाउनुको उद्देश्य भारतीय बजारमा आपुर्ति बढाउनु हो ।
यसको सिधा असर नेपाली बजारमा पर्ने भएकोछ । नेपालले आन्तरिक खपतका लागि भारतबाटै आलु आयात गर्ने गरेको छ । स्थानीय उत्पादनले अपुग हुने आलु भारतबाट आउने भएकाले अब एमइपि लागू भएपछि नेपालमा पनि मूल्य बढ्ने भएको हो । २०१५ फरवरीमा आलुको भाउ निकै घटेपछि भारत सरकारले यस्तो शुल्क हटाएको थियो ।
अब भारतबाट नेपाल निर्यात हुने आलुको मूल्य न्युनतम ३८ हजार ७८७ रुपैयाँ प्रति टन पुगेको छ । यसमा यातायात तथा व्यवसायीको नाफा राखिएको छैन ।
१२ साउन २०७३, १०।००
वि.सं.२०७३ साउन १२ बुधवार ११:०४ मा प्रकाशित
