नदी प्रवाही (आरओआर) आयोजनाको विद्युत खरिद सम्झौता (पिपिए) गर्दा अब जलविद्युत उत्पादकले २ महिना समय बोनस पाउने भएका छन् । पिपिएको नयाँ कार्यविधि तयार गर्दा हिउँद र बर्खायामको समय हेरफेर गरेकाले उत्पादकलाई सुविधा पुग्ने भएको हो ।
पिपिए सम्बन्धी पुरानो कार्यविधिमा मंसिरदेखि चैतसम्म हिउँद र बाँकी ८ महिना बर्खायाम तोकिएको थियो । तर, नयाँ कार्यविधिमा मंसिर १६ देखि जेठ १५ सम्म (६ महिना) हिउँद र जेठ १६ देखि मंसिर १५ सम्म बर्खायाम निर्धारण गरिएको छ ।
हिउँदमा प्रतियुनिट ८.४० रुपैयाँ र बर्खामा प्रतियुनिट ४.८० रुपैयाँ पिपिए गर्दै आएका उत्पादकले चार महिनामात्र हिउँदको दरमा भुक्तानी पाउँथे । तर, अब ६ महिना हिउँदको दर (८.४रुपैयाँ) पाउने भएका छन् । यसो हुँदा आयोजना निर्माणमा स्वेदशी निजी क्षेत्र आकर्षित हुने नेपाल विद्युत प्राधिकरणका प्रवक्ता प्रबल अधिकारीले बताए ।
‘बैशाख १३ गते प्राधिकरण सञ्चालक समितिले पिपिए सम्बन्धी कार्यविधि पास गरेको छ,’ उनले भने, ‘बैशाख १४ देखि यो नियम कार्यान्वयन भयो । पिपिए सस्तो भयो भन्ने निजी क्षेत्रको गुनसोलाई यो व्यवस्थाले सम्बोधन गरेको उनको भनाइ छ ।
हिउँद र बर्खाको समय हेरेफेर हुँदा आयोजनाबाट उत्पादन हुने ऊर्जाको परिमाण पनि परिवर्तन भएको छ । अधिकारीका अनुसार हिउँद समय ४ महिना गणना गर्दा आयोजनाले सुख्खायाममा कूल क्षमताको १५ प्रतिशत ऊर्जा अनिवार्य पुर्याउनुपथ्र्यो । बैशाख १४ देखि पिपिए हुने आयोजनाले सुख्खायामको ६ महिना कूल क्षमताको कम्तिमा ३५ प्रतिशत ऊर्जा पुर्याउनुपर्छ ।
‘कुनै नदी प्रवाही (आरओआर) आयोजनाले ३५ प्रतिशत ऊर्जा पुर्याउनुपर्ने व्यवस्थामा जान नचाहे पुरानै व्यवस्था (बर्खा ८ महिना र हिउँद ४ महिना) मा पनि पिपिए गर्न सक्नेछन्,’ उनले भने, ‘यो व्यवस्था स्वदेशी लगानीकर्तालाई मात्र लागू हुनेछ ।’
प्रकाशित मितिः २०७४ बैशाख २२
वि.सं.२०७४ वैशाख २२ शुक्रवार १२:२७ मा प्रकाशित