काठमाडौ । प्रधानमन्त्री पुष्पकमल दाहाल प्रचण्डले गोवामा चिनियाँ राष्ट्रपति सी जीनपिङ र भारतीय प्रधानमन्त्री नरेन्द्र मोदीसँगको त्रिपक्षीय भेट भएपछि उनले नसोचेको खुसी प्राप्त भएको छ । उनले आफुले सोच्दै नसोचेको सुखद संयोग भएको बताएका छन् ।
भारतको गोवमा सम्पन्न ब्रिक्स सम्मेलनमा पर्यबेक्षकका रुपमा सहभागी भएर सोमबार स्वदेश फर्केपछि प्रधानमन्त्री प्रचण्डले अन्तर्राष्ट्रिय विमान स्थलमा संचारकर्मीसँग भने, “गोवामा भारतीय प्रधानमन्त्री नरेन्द्र मोदी र चिनियाँ राष्ट्रपति सी जीनपिङलाई एक ठाउँमा भेटवार्ता गर्न पाइएला भनेर मैले सोचेको थिइनँ । यो नसोचेको मिठो संयोग भयो । यो दुर्लभ संयोग हो ”
प्रचण्डले सी र मोदीसँगको भेट पूर्वनिर्धारित तथा योजनावद्ध नरहेको स्पष्ट पार्दै भने, “सरकारी अधिकारीसहित सी सँग दुईपक्षीय भेटवार्ता सकिएपछि त्यही होटेलका प्रतिक्षा कक्षमा म गाडी कुरिरहेको थिए । अचानक चिनियाँ राष्ट्रपति आउनुभयो। उहाँसँग मैले १२१५ मिनेट कुराकानी गरे । त्यही बीचमा अकास्मात् मोदीजी प्रवेश गर्नुभयो र मैले दुवै नेतासँग एकै स्थानमा सम्वाद गर्ने अवसर पाए।”
“यस्तो दुर्लभ अवसर पाउनेछु भनेर मैले सोचेको थिइनँ । चीनका राष्ट्रपतिलाई एक्लै भेट्छु भन्ने चाहना थियो । तर टुप्लुक्क आइपुग्दा ढुंगा खोज्दा देउता मिलेजस्तो भयो । त्यहाँ मोदीजी पनि सामेल हुँदा त्यो अन्त्यन्तै सुखद संयोग भइदियो । यो मेरा लागि मात्र होइन, देशकै लागि ठूलो अवसर हो ।” उनले भने ।
प्रचण्डले त्रीपक्षीय भेटको अवस्थिति पनि संयोग नै हुनपुगेको बताउँदै भने, “प्रतिक्षा कक्षमा दक्षिणतिर मोदीजी हुनुहुन्थ्यो भने उत्तरतिर सी जी भन्नुहुन्थ्यो । बीचमा म थिए ।”
अन्तर्राष्ट्रिय मञ्चहरुमा आफूले नेपालको हितको पक्षमा दह्रोसँग कुरा राखेको भन्दै प्रधानमन्त्री प्रचण्डले मोदी र सीसँगको संयुक्त भेटपछि आफ्नो छाती गर्वले फुलेको बताए ।
प्रकाति मिति २०७३ कार्तिक १
वि.सं.२०७३ कात्तिक १ सोमवार १७:४० मा प्रकाशित
