काठमाडौ । प्रेस काउन्सिल–सानिमा बैंक राष्ट्रिय पत्रकारिता पुरस्कार छनौट समितिले यस वर्षको प्रेस काउन्सिल सानिमा बैंक राष्ट्रिय पत्रकारिता पुरस्कार मरणोपरान्त स्वर्गीय पत्रकारद्वय सञ्जय न्यौपाने र कर्ण बोहरालाई संयुक्तरुपमा प्रदान गर्ने निर्णय गरेको छ ।
प्रेस काउन्सिल नेपालले आज पाँच लाख रुपैयाँ राशि रहेको उक्त पुरस्कार दुवै पत्रकारका परिवारलाई संयुक्तरुपमा प्रदान गरिने निर्णय गरेको हो । काउन्सिलका अध्यक्ष बोर्णबहादुर कार्कीको संयोजकत्वमा नेपाल पत्रकार महासङ्घका अध्यक्ष डा महेन्द्र बिष्ट र सानिमा बैंक लिमिटेडका प्रमुख कार्यकारी अधिकृत भुवनकुमार दाहाल सदस्य एवम् काउन्सिलका मुख्य अधिकृत झवीन्द्र भुसाल सदस्यसचिव रहेको पुरस्कार छनौट समितिले सर्वसम्मतिले सो निर्णय गरेको हो ।
उक्त पुरस्कार विशेष समारोह आयोजना गरी चाँडै प्रदान गरिनेछ । स्व सञ्जय न्यौपाने कान्तिपुर राष्ट्रिय दैनिकमा लामो समयसम्म रिपोर्टिङ, उपसम्पादक हुँदै प्रमुख संवाददाता र आर्थिक ब्युरो प्रमुखका रुपमा कार्यरत थिए । त्यसपछि उनी आर्थिक क्षेत्रको पहिलो ‘ब्रोडसिट’ कारोबार दैनिकमा सम्पादकका रुपमा रहे ।
राष्ट्रिय–अन्तर्राष्ट्रिय क्षेत्रबाट थुप्रै फेलोसिप र पुरस्कार प्राप्त गरेका पत्रकार न्यौपाने आर्थिक पत्रकार समाज (सेजन)को पूर्व उपाध्यक्ष समेत हुन् । पत्रकारितामा क्रियाशील रहिरहेकै बेला मस्तिस्कसम्बन्धी गम्भीर रोगबाट ग्रस्त भई उपचारकै क्रममा उनको २०७३ साल कात्तिक २० गते निधन भएको थियो ।
त्यस्तै कञ्चनपुरको महेन्द्रनगरबाट प्रकाशित अभियान दैनिकको डडेल्धुरा संवाददाताका रुपमा पत्रकारिता सुरु गर्नुभएका स्व कर्ण बोहरा स्थानीय कालापानी साप्ताहिक महानगर पोस्ट र राष्ट्रिय तहका स्पेसटाइम दैनिक, च्यानल नेपाल टेलिभिजन, रहस्य साप्ताहिक लगायत सञ्चारमाध्यममा आबद्घ थिए ।
पछिल्लो समयमा उनी महेन्द्रनगरबाट प्रकाशित पश्चिम नेपालको सम्पादक÷प्रकाशक, महेन्द्रनगरबाटै प्रसारित पश्चिम नेपाल रेडियोको प्रबन्ध निर्देशक तथा काठमाडौँबाट प्रसारित न्युज–२४ टिभीको सुदूर–पश्चिम ब्युरो प्रमुखका रुपमा कार्यरत थिए ।
पछिल्लो समयमा मुटु रोगका साथै मधुमेह र उच्च रक्तचापबाट पीडित पत्रकार बोहराको दुवै मिर्गौला खराब भई उपचार गराइरहेकी श्रीमतीको कुरुवा बसेको अवस्थामा २०७३ मङ्सिर १० गते काठमाडौँमा निधन भएको थियो ।
प्रकाशित मितिः २०७३ मंसिर १४
वि.सं.२०७३ मंसिर १४ मंगलवार २०:३४ मा प्रकाशित
