लमजुङ । बेलायती राजकुमार हेनरी चार्ल्स अल्बर्ट डेभिड आज जिल्लाको गौंडामा बास बस्ने तय भएपछि उनका लागि साँझको खानामा कोदोको ढिंढो र दुईवटा लोकल कुखुरा तयार पारिएकोछ ।
गौँडा–७, लेउरानीस्थित ८७ वर्षीया मंगली तामाङको घरमा ह्यारीले आज बास बस्नेछन् । उनका लागि मंगलीको एक तले घरमा रातीका लागि भने ओछ्यान पनि तयार पारिएको छ । साथै ह्यारीसँगै आउने पाहुनाहरुका लागि भनेर घर नजिकैको चउरमा टेन्ट पनि गाडिसकिएकोछ ।
नेपाली सेनाको हेलिकप्टरमार्फत गौँडा–४, भीरकुनामा ओर्लिसकेका ह्यारीले साँढे १ घण्टाको बाटो ट्रेकिङ गरी लेउरानी पुग्नेछन् । साँझ सूर्यास्त हेरेपछि स्थानीयले प्रदर्शनले गर्ने सँस्कृतिक कार्यक्रममा पनि उनी सहभागी हुनेछन् । त्यसपछि मंगलीको परिवारसँगै खाना खाएर त्यही घरमा उनी बास बस्नेछन् ।
चैत ८, २०७२, ४.३०
वि.सं.२०७२ चैत ८ सोमवार १७:२३ मा प्रकाशित
