काठमाण्डौं । नेपालको पाँच दिने औपचारिक भ्रमण सकाएपछि अन्तिम दिन बाँकी ६ दिन यतै बिताउने बताएका बेलायती राजकुमार ह्यारी कहाँ छन् भन्ने कुरा गोप्य राखिएकोछ ।
बाँकी ६ दिनको उनको कार्यक्रममा नेपाली मात्र हैन, बेलायती र अरु अन्तर्राष्ट्रिय मिडियालाई पनि सहभागी नगराइएपछि उनी हराए जस्तै भएका छन् । यस्तै केनसिङ्टन प्यालेसका तर्फबाट विज्ञप्ति जारी गर्दै बेलायती राजदूतावासले सबै मिडियालाई राजकुमार ह्यारीको गोपनीयताको सम्मान गर्न आग्रह गरेको छ।
ह्यारीले टिम रुबिकन युकेका स्वयंसेवकहरुसँगै मिसिएर मध्य नेपालको दुर्गम गाउँमा भूकम्पले भत्किएको एउटा स्कूल पुननिर्माण गर्ने बताइएको भएतापनि कुन ठाउँ र कुन स्कुल भन्ने थाहा भएको छैन । टिम रुबिकन युके गत वैशाख १२ को भूकम्पपछि गठन गरिएको संस्था हो। यसको अध्यक्षमा बेलायतको स्थल सेनाका पूर्व कमान्डर इन चिफ सर निक पार्कर रहेका छन्। बेलायती दूतावासले यसबारे फोटो र भिडियो उपयुक्त समयमा मिडियालाई उपलब्ध गराउने पनि बताएको छ।
१२ चैत, २०७२, ११.००
वि.सं.२०७२ चैत १२ शुक्रवार ११:४५ मा प्रकाशित
