धरान । त्रिभुवन विश्वविद्यालय इन्जिनियिरिङ अध्ययन संस्थानले शुल्क वृद्धि गरेपछि धरानस्थित पूर्वाञ्चल इन्जिनियरिङ क्याम्पसका विद्यार्थी आन्दोलनमा उत्रिएका छन् । इन्जिनियिरिङ अध्ययन संस्थानको परीक्षा नियन्त्रण महाशाखाले ७० प्रतिशत शुल्क वृद्धि गरेको भन्दै प्रमुख सत्तारुढ दुई प्रमुख दलका विद्यार्थी संगठनहरु आन्दोलित भएका हुन् ।
एक साताअघि इन्जिनियरिङ संस्थानअन्तर्गतको परीक्षा नियन्त्रण महाशाखाले आंगिक क्याम्पसमा शुल्क बढाएको पत्राचार गरेको थियो । सत्तारुढ दल नेपाली कांग्रेस निटक नेपाल विद्यार्थी संघ र माओवादी निकट अखिल क्रान्तिकारीले चारदिनदेखि धरान इन्जिनियरिङ क्याम्पसमा तालाबन्दी गरेका थिए । जसका कारण इन्जिनियरिङ अध्ययन पूर्ण रुपमा ठप्प भएको थियो । तालाबन्दीबाट कुनै असर नपरेको र विद्यार्थीहरुको पढाइ प्रभावित मात्र भएपछि दुई विद्यार्थी संगठनका नेताहरुले क्याम्पसको प्रशासन अगाडि आमरण अनशन सुरु गरेका हुन् ।
आन्दोलित विद्यार्थी संगठनहरुले विद्यार्थी संग छलफल नगरी विद्यार्थीको ढाड सेक्ने गरी विश्वविद्यालयको एकलौटी रुपमा शुल्क वृद्धि गरेको भन्दैं आमरण अनसन समेत सुरु गरेका छन् । उनीहरुले शुल्क वृद्धि गर्ने निर्णय तुरुन्त फिर्ता गर्नुपर्ने माग समेत गरेका छन् । नेविसंघका उपसभापति सरोज अधिकारी र अखिल क्रान्तिकारीका उपाध्यक्ष कृष्णराज न्यौपाने आमरण अनशनमा बसेका छन् ।
प्रकाशित मितिः २०७४ साउन १
वि.सं.२०७४ साउन १ आइतवार १७:३६ मा प्रकाशित
