काठमाडौं । निजी तथा आवासीय विद्यालय अर्गनाइजेशन नेपाल (प्याब्सन)का उपमहासचिव राजेन्द्र बानियाँले सरकारले शिक्षाको नाममा कालो व्यापार गरेको आरोप लगाएका छन् । विभूति विद्या मन्दिरको १०औं अभिभावक दिवसका अवसरमा उपमहासचिव बानियाँले निजी विद्यालय दर्ता गर्न तीन लाख रुपैयाँ तिर्नु पर्ने तर सरकारी तलब र भत्ता खाएर सञ्चालन गरेको दरबार हाई स्कुलको अवस्था नाजुक हुँदै गएको सन्दर्भ उल्लेख गर्दै यस्तो बताएका हुन् ।
उनले सरकारको बजेटमा ११ प्रतिशत शिक्षाकै लागि खर्च हुँदा पनि सरकारी विद्यालयहरुको अवस्था सुध्रिन नसकेको प्रति चिन्ता व्यक्त गर्दै निजी विद्यालयले आफ्नै लगानी र मेहनतमा गरेको प्रगतिको प्रशंसा गरे । अधिकांश समय सरकारको शिक्षा प्रणालीमा खर्चनु भएका बानियाँले निजी विद्यालयलाई कुनै सुविधा नदिएको तर हरेक विद्यार्थीको टाउकोमा कर थुपारिदिएको बताए । एक अर्को प्रसंगमा उनले सरकारलाई बनमारा घाँस र निजी विद्यालयलाई फूलको शंज्ञा दिदै निजी विद्यालयलाई सरकारले हेर्ने दृष्टीमा परिवर्तन गर्न आवश्यक रहेको बताए ।
उक्त अवसरमा विद्यालयले प्रकाशन गरेको द्वैमासिक पत्रिका ‘विभूति आवाज’को लोकार्पण गरिएको थियो ।
प्रकाशित मितिः २०७३ माघ २२
वि.सं.२०७३ माघ २२ शनिवार १९:०७ मा प्रकाशित
