काठमाडौ । तरलता अभाव खेपेका बैंकहरुलाई राष्ट्र बैंकले ५ अर्ब रुपैया दिने भएको छ । जसका लागि राष्ट्र बैंकले विकास ऋणपत्र सोझै खरिदको बोलकबोलको सूचना जारी गरेको छ । केही वाणिज्य बैंकसंग लगानीयोग्य रकम नभएपछि राष्ट्र बैंकले बैंकहरुसँग रहेका विकास ऋणपत्रहरु खरिद गरेर ती बैंकहरुलाई रकम उपलब्ध गराउने भएको हो ।
नेपाल राष्ट्र बैंकले यही पुष १६ गते आइतबार पाँच अर्ब रुपैयाँ वित्तीय बजारमा पठाउने भएको छ । राष्ट्र बैंकले बैंक तथा वित्तीय संस्थाहरुसँग रहेको विकास ऋणपत्र खरिद गरेर उक्त रकम बैंकिग प्रणालीमा पठाउने भएको हो ।
राष्ट्र बैंकका अनुसार बैंकिग क्षेत्रमा ३३ अर्ब बढी अधिक तरलता रहेको छ ।तर बैंकहरुले भने रकम अभाव भएको भन्दै उच्च ब्याजदर कबुलेर संस्थागत लगानीकर्ताहरुबाट निक्षेप माग गरेका छन् । अर्कातर्फ बैंकहरुले आफुसँग भएको निक्षेप बाहिरिन नदिन धमाधम मुद्धती बचतको ब्याजदर समेत बढाउन थालेका छन् ।
यो विकास ऋणपत्रको खरिदबाट बैंकहरुमा पाँच अर्ब रुपैयाँ प्रवाह हुने र यसले तत्काल देखिएको तरलताको असहज अवस्थालाई सम्बोधन गर्ने राष्ट्र बैंकको भनाई छ ।
बैंकहरुले आगामी आइतबार आफुसँग भएका विकास ऋणपत्रहरु बिक्री गरेर राष्ट्र बैंकबाट रकम लिन सक्नेछन् । विकास ऋणपत्रको ब्याजदर भने बोलकबोलबाट हुने राष्ट्र बैंकले जनाएको छ ।
२०७४ पुष १३ गते प्रकाशित
वि.सं.२०७४ पुस १३ बिहीवार १५:४४ मा प्रकाशित