परमेश्वर बर्तौला
हेटौंडा । मकवानपुर उद्योग बाणिज्य संघको आयोजनामा जारी राष्ट्रिय औद्योगिक ब्यापार मेलाको दोस्रो दिन शुक्रबार करिब १० हजार जनाले मेलाको अवलोकन गरेका छन् । दोस्रो दिन करिब १५ लाख रुपियाँ बराबरको कारोवार भएको संघका अध्यक्ष तथा मेला संयोजक राजकुमार न्यौपानेले बताए ।
लोक गायक जीवन परियार, गायिकाद्वय जुनु रिजाल र आस्था वि राउत, रामचन्द्र काफ्ले, रविनकुमार चेपाङले सहभागी दर्शकलाई भरपूर मनोरञ्जन प्रदान गरेका थिए ।
साना सवारीको आन्दोलनका कारण नगर आसपासका ग्रामीण भेगबाट उल्लेख्य दर्शकको सहभागिता नभए पनि नगर क्षेत्रका अवलोकनकर्ताहरुको भने राम्रो उपस्थिति थियो । साथै स्थानीय कलिउड कला केन्द्र, फ्युजन डान्स सेन्टर, तलेजु डान्स सेन्टर, सिर्जना कला केन्द्रका कलाकारहरुले विशेष सांगातिक प्रस्तुतीका साथमा नृत्य प्रस्तुत गरेका थिए ।
मेलामा चुरेहिल अस्पताल प्रालिले छाला तथा यौनरोग सम्बन्धी निःशुल्क स्वास्थ्य शिविर सञ्चालन गरेको थियो । जसमा ४३ जनाको स्वास्थ्य परिक्षण गरिएको थियो । त्यसैगरी युनियन ड्रग हाउसले पनि निःशुल्क स्वास्थ्य परिक्षण गरेको थियो ।
मेलाको आकर्षणको रुपमा एनिमेट्रोनिक डाइनोसर, माँ बैष्णव मन्दिर, बालउद्यान, चिडियाखानाका साथै कृषि कार्यालयले जिउँदो माछा तथा कृषि उत्पादनहरु प्रदर्शनीका लागि राखिएको थियो भने खानाका नौलो परिकार चाख्नेहरुको पनि भीड उत्तिकै रहेको थियो ।
शनिबार आउने कलाकारहरु
१ हास्यकलाकार दिपकराज गिरी र दीपाश्री निरौला
३. गायिका मिलन अमात्य
४. लोकगायक बद्री पंगेनी
५. गायिका रमिता भण्डारी
वि.सं.२०७२ फागुन २२ शनिवार १०:३६ मा प्रकाशित
