काठमाडौं । पूर्ण सरकारी स्वामित्वको राष्ट्रिय वाणिज्य बैंकको ३० प्रतिशत सेयर सर्वसाधारणमा जारी गर्ने विषयले दुई वर्ष अघि देखि सेयर बजारमा निकै चर्चा कमाएको छ । तत्कालीन अर्थमन्त्री डा.रामशरण महतले वाणिज्य बैङ्कको स्वर्णजयन्तीको अवसरमा ३० प्रतिशत सेयर सर्वसाधारणमा जारी गर्ने प्रक्रियालाई जोड दिएका थिए । तर खासै केहि हुन सकेन ।
त्यसपछि बैंकको सेयर जारी प्रक्रिया नै अन्यौलमा पर्यो । सरकार परिवर्तनसँगै आएका अर्थमन्त्री विष्णु पौडेलले सरकारी स्वामीत्वको एक बाणिज्य बैंक चाहिने भन्दै यो विषयलाई प्राथमिकतामा राखेनन् ।
बैंकमा नयाँ प्रमुख कार्यकारी अधिकृतको रुपमा किरणकुमार श्रेष्ठको प्रवेससँगै फेरी यो विषयले गति लिएको छ । हाल साधारण सेयर जारी गर्ने प्रस्ताव पारितको लागि मन्त्रीपरिषदमा पेश भएको बैंकले जनाएको छ । मन्त्रीपरिषद्बाट प्रस्ताव पारित भएर आएसँगै सर्वसाधारणमा सेयर जारी गरिने बैंकको भनाई छ । सर्वसाधारणमा सेयर जारी घोषणा गरेको २ वर्ष पछि पुनःप्रक्रिया अघि बढेको हो ।
हाल बैंकको चुक्ता पुँजी ८ अर्ब ५८ करोड रुपैयाँ पुगेको छ । बैंकले उक्त पूँजीबाट सर्वसाधारणमा ३० प्रतिशत सेयर जारी गर्न लागेको छ । जसअनुसार बैंकले सर्वसाधारणमा साँढे २ अर्ब रुपैंया माथिको आईपीओ जारी गर्ने छ । बैंकले प्रिमियम मूल्यमा सेयर जारी गर्ने तयारी गरेको बताइएको छ ।
प्रकाशित मितिः २०७३ माघ ७
वि.सं.२०७३ माघ ७ शुक्रवार १६:३७ मा प्रकाशित
